चर्चित लोक गायक बद्री पंगेनी गृहजिल्ला पाल्पा पुगेर नेकपा एमालेका उम्मेदवारका लागि भोट मागेका छन् ।

एमालेको तर्फबाट पाल्पाको २ नम्बर निर्वाचन क्षेत्रका उम्मेदवार ठाकुर गैरेका लागि पंगेनीले भोट मागेका हुन् । पंगेनीको घर पाल्पाको १ नम्बर क्षेत्रमा पर्छ ।
 
मंगलवार बगनासकाली गाउँपालिका–६ मा आयोजित कार्यक्रममा बोल्दै पंगेनीले उम्मेदवार गैरेको खुलेर प्रशंसा गर्दै उनको पक्षमा मत मागेका हुन् ।

उनले गैरे सरल, शालिन नेता भएको बताउँदै उनीबाटै विकास र परिवर्तन सम्भव हुने बताए । ‘उहाँले ल आइदिनुपर्‍यो । मलाई सहयोग गरिदिनुपर्‍यो भनेर म यो ठाउँमा आएको होइन,’ पंगेनीले भने, ‘उहाँबाटै अबको देश परिवर्तन हुनसक्छ । हामीले चाहेको पाल्पा बनाउन सक्छौं । २ नम्बर क्षेत्रका धेरै क्षेत्रहरू जहाँ विकास गर्नुपर्नेछ । जहाँ बाटोघाटो, खानेपानी, रोजगार, अस्पतालको आवश्यकता छ, यी सबै कुराहरूको सम्बोधन गर्न उहाँहरूमा शंका गर्ने ठाउँ छैन ।’

उनले प्रदेशसभा सदस्य उम्मेदवारका लागि पनि भोट मागेका छन् । कार्यक्रममा पंगेनीले नसक्ने वाचाहरू मतदातासामु नगरिदिन पनि उम्मेदवारलाई आग्रह गरेका छन् ।

‘काम गर्न सक्ने कुराहरू मात्र गर्छु भनिदिनुहोला,’ पंगेनीले भने, ‘भोलि तपाईंहरूले चुनाव जितिसकेपछि जनतासामु अहिले गरेका वाचा पूरा गर्न सक्नुभएन भने हामीले गाली खान्छौं । स्थानीय नेताहरूले गाली खान्छन् । त्यसकारण काम गर्न सक्ने कुराहरू मात्र गर्छु भन्नुहोला ।’

पंगेनीले कार्यक्रममा एमालेको चर्चित गीत ‘सै पनि एमाले’ समेत गाएका थिए । सो निर्वाचन क्षेत्रका चर्चित गायक शिरिष देवकोटा पनि ठाकुर गैरेको पक्षमा खुलेर लागेका छन् । गायक पंगेनी यसअघि एमालेको तर्फबाट रुपेन्देहीको २ नम्बर निर्वाचन क्षेत्रका उम्मेदवार विष्णु पौडेलको घरदैलोमा समेत सहभागी भएका थिए ।