भारतका प्रधानमन्त्री नरेन्द्र मोदी नेतृत्वको मन्त्रिमण्डलमा हेरफेर हुने चर्चा शुरू भएको छ ।

आगामी १४ जनवरीपछि मन्त्रिमण्डलमा हेरफेर हुनसक्ने भारतीय सञ्चारमाध्यमले जनाएका छन् । बजेटसत्र हुनुअघि नै हेरफेर र विस्तार हुने चर्चा छ ।

यसैगरी सत्तारुढ भारतीय जनता पार्टी (भाजपा) नेतृत्व समेत बदलिने सम्भावना छ । अध्यक्ष जेपी नड्डाको कार्यकाल २० जनवरीमा सकिँदैछ । पार्टीले राष्ट्रिय कार्यकारिणी समितिको बैठक जनवरीमा आयोजना गरेको छ ।

आगामी वर्ष भारतका ९ प्रदेशमा विधानसभा चुनाव र सन् २०२४ मा लोकसभा चुनाव हुँदैछ । भाजपा आगामी चुनावको तयारीमा समेत जुटेको छ । चुनावलाई ध्यानमा राखेर भाजपाले सरकार र संगठनमा फेरबदल गर्न लागेको भारतीय सञ्चारमाध्यमले जनाएका छन् ।