नेपाली कांग्रेसका सांसद रामहरि खतिवडाले हत्या अभियोग लागेका सांसदबारे पहिला निर्णय गरेर सभामुख निर्वाचन प्रक्रिया शुरू गर्नुपर्ने माग गरेका छन् ।

बिहीवार बसेको प्रतिनिधिसभा बैठकमा अध्यक्षता गरेका ज्येष्ठ सदस्यले सभामुख निर्वाचनको प्रक्रिया शुरू गरेलगत्तै खतिवडाले नियमापत्ति गरेका थिए । 

‘सभामुखको निर्वाचन हुने बेलामा हत्याको अभियोग लागेका सदस्यहरू पनि यहाँ छन् भन्ने सुनिन लागेको छ । गृहमन्त्री पनि यहीँ हुनुहुन्छ । यदि हत्या अभियोग लागेका सांसद यहीँ हुनुहुन्छ भने उहाँले मतदान प्रक्रियामा भाग लिन पाउने/नपाउने निर्णय गरेर सभा सञ्चालन गरियोस्,’ खतिवडाले भने । 

महोत्तरी–१ बाट निर्वाचित एमाले सांसद लक्ष्मी महतो कोइरी संसदमा उपस्थित भएको भन्दै खतिवडाले विरोध जनाएका हुन् ।

फरार अभियुक्तको सूचीमा रहेका कोइरी प्रधानमन्त्री पुष्पकमल दाहाल ‘प्रचण्ड’लाई विश्वासको मत दिन पनि उपस्थित भएका थिए ।