कञ्चनपुरमा कोभिड विरुद्धको बुस्टर डोज खोप लगाउनेको संख्या न्यून छ ।

जिल्ला स्वास्थ्य कार्यालय कञ्चनपुरले बिहीवारदेखि ‘बुस्टर डोज’ खोप अभियान शुरूआत गरेको थियो । खोप लगाउनेको संख्या न्यून रहेको जिल्ला स्वास्थ्य कार्यालय कञ्चनपुरका कोल्ड चेन अधिकृत जनक कुँवरले जानकारी दिए ।

भारतबाट नेपाल फर्किनेमा कोरोना संक्रमण देखिन थालेपछि कोभिड विरुद्धको तेस्रो मात्रा र चौथो मात्राको खोप अभियान शुरू भएको थियो तर खोप अभियानका सहभागीको संख्या न्यून रहेको उनले बताए ।

‘खोप लगाउनेको संख्या धेरै कम छ पहिलो डोज पछि धेरै मानिस खोप लगाउन आएनन्,’ उनले भने, ‘अहिलेको खोप अभियानमा पनि खोप लगाउन आउनेको संख्या धेरै कम छ, खोप लगाउन सबैलाई आग्रह गर्छौं ।’

अहिले ५५ वर्षमाथिका ज्येष्ठ नागरिक, स्वास्थ्यकर्मी, गर्भवती र रोग प्रतिरोधात्मक क्षमता कम भएकालाई बुस्टर डोजका रूपमा खोप दिन थालिएको छ । कञ्चनपुरको बेदकोट नगरपालिकाका स्वास्थ्य शाखा प्रमुख हरिशा पालले बुस्टरडोज लगाउन आउने संख्या न्यून रहेको बताइन् । ‘हाम्रो नगरपालिकामा ५ हजार ४०० डोज खोप आएको छ,’ उनले भनिन्, ‘शनिवारसम्म करीब १ हजार ५०० जनाले मात्रै खोप लगाएका छन्, यो न्यून हो । उनले सोमवार खोप अभियानको अन्तिम दिन भएकाले संख्या बढ्न सक्ने बताइन् ।

‘हामीले गाउँगाउँमा माइकिङ समेत गरेका हौं,’ उनले भनिन्, ‘यसपटक बुस्टर डोज लगाउन न्यून मानिस आए ।’ 
    
भीमदत्त नगरपािलकाका स्वास्थ्य शाखा प्रमुख नरेन्द्रराज जोशीले पनि पालिकामा १० हजार डोज खोप आए पनि खोप लगाउने मानिसको संख्या धेरै कम रहेको बताए । ‘पहिलोपटक खोप लगाउँदा भ्याइँनभ्याइँ थियो, अहिले आएको खोप समेत फिर्ता गर्नुपर्ने अवस्था आएको छ,’ उनले भने, ‘सबै वडाका स्वास्थ्य संस्थामा खोप उपलब्ध छ लगाउन आउनेको संख्या न्यून छ ।’
    
कार्यालयका अनुसार कञ्चनपुरमा बुस्टर डोजका लागि ५० हजार डोज खोप आएको छ । कार्यालयको तथ्यांकअनुसार हालसम्म कञ्चनपुरमा ४८ दशमलव ३० प्रतिशतले मात्रै कोभिड विरुद्धको खोप लगाएका छन् । जिल्लामा ४ लाख ४ हजार ५४५ जनाले कोरोना विरुद्धको खोपको पहिलो मात्रा लगाएका छन् । 

त्यसैगरी ३ लाख ६४ हजार ७८५ जनाले दोस्रो मात्रा लगाएका छन् भने २ लाख १६ हजार ६६७ जनाले खोपको तेस्रो मात्रा लगाएका छन् । पहिलो मात्रापछि खोप लगाउनेको संख्या घट्दै गएको स्वास्थ्य कार्यालयले जनाएको छ ।