०८ साउन २०८३, शुक्रबार
चलचित्र विकास बोर्डमा केही आध्यात्मिक संस्थाहरूले नेपाली चलचित्र ‘एक भगवत गीता’को नामबारे उठाएका प्रश्न र विमतिको विषयमा छलफल भएको छ ।
भदाै २९ गते रिलिज मिति तोकिएको चलचित्रको नाम परिवर्तन गर्नुपर्ने माग आध्यात्मिक विकास समाज, हिन्दू जागरण नेपाल र विश्व हिन्दू युवा संघ अन्तराष्ट्रिय समितिले गरेका थिए । श्रीमद् भगवत् गीता कुनै कथा नभई सन्देशहरूको ग्रन्थ भएको कारण कथाको रूपमा गलत तरिकाले प्रस्तुत गर्न लागिएको आरोप ती संस्थाहरूले लगाएका थिए ।
छलफलमा निर्माण पक्षले भगवत गीताको नाममा कुनै गलत सन्देश दिन नलागेको प्रष्ट पारेको छ । गीताले दिएको कर्मयोगको सन्देशलाई आम मानिसमाझ परिचित गराउनु चलचित्रको उद्देश्य रहेको निर्माण पक्षले जनाएको छ ।
आध्यात्मिक गुरूहरूले स्क्रिप्ट र चलचित्र हेरेपछि नामसम्बन्धी विवाद टुंग्याउने सहमति भएको छ ।
बोर्ड अध्यक्ष भुवन केसीले चलचित्रको निर्माता परिवार नै अध्यात्ममा विश्वास राख्ने भएकोले चलचित्रले धर्मग्रन्थलाई गलत व्याख्या नगर्ने विश्वास लिएको बताए । ‘हुनत मैले यो चलचित्र हेरेको छैन । तर पनि उहाँहरूको परिवारका सबै सदस्य नै आध्यात्मिक रहेको कारण श्रीमद् भगवत् गीताको सन्देशविपरीत चलचित्र बनाउनुभएको छ भन्ने लागेको छैन,' उनले भने, 'यद्यपि चलचित्र हेरेर मात्र नाम परिवर्तनको विषयमा निर्णय लिनु उत्तम हुनसक्छ ।’ केसीले समस्या समाधानको लागि बोर्डले सदैव सबै पक्षलाई स्वागत गर्ने जिकिर गरे ।
बोर्डका प्रवक्ता केएल बुढाथोकीले एक भगवत् गीताबारेको विवाद र विमति सकारात्मक निष्कर्षमा पुर्याउने सहमति भएको बताए । चलचित्रले कुनै पनि जात, धर्म र समुदायमाथि आघात पुर्याउने, विभेद सिर्जना गर्ने, द्वैष र घृणा फैलाउने वा कुनै किसिमको मानहानी हुने आशय व्यक्त गर्नु हुँदैन भन्ने कुरामा बोर्ड स्पष्ट र दृढ रहेको बुढाथोकीले बताए । बोर्ड सिर्जनात्मक स्वतन्त्रताको पक्षधर रहेको उनको जिकिर छ ।
बोर्डका अध्यक्ष भुवन केसीको उपस्थितिमा भएको छलफलमा चलचित्रको तर्फबाट निर्माता सुनिलकुमार थापा, निर्देशक झरना थापा र नायिका सुहाना थापा सहभागी थिए । यस्तै हिन्दू जागरण नेपालका रामकृष्ण उपाध्याय, हरिप्रसाद पाठक, शिव सेना नेपालकी सिर्जना वाग्ले, मनोज सापकोटा, विश्व हिन्दू युवा संघ अन्तराष्ट्रिय समितिका सागर थापालगायत आध्यात्मिक संस्थाका प्रतिनिधिहरूको उपस्थिति थियो ।
छलफलमा बोर्डका सदस्य सचिव विशाल सापकोटा, सदस्यहरू राजु केसी र रविचन्द्र अधिकारीसहित चलचित्र वितरकद्वय गोपाल कायस्थ र गोविन्द शाही, चलचित्र निर्माता उदय सुब्बा लगायतको सहभागिता थियो ।
