ललितपुर महानगरपालिकाले मंगलवारबाट स्वास्थ्य बीमा कार्यक्रममार्फत स्वास्थ्य सेवा शुरू गरेको छ । 

महानगरले पाटन स्वास्थ्य विज्ञान प्रतिष्ठान (पाटन अस्पताल)को सञ्चालन र व्यवस्थापनमा स्वास्थ्य सेवा शुरू गरेको हो । स्वास्थ्य सेवा पुल्चोकमा रहेको यल स्वास्थ्य सेवा केन्द्रबाट लिन सकिने महानगरले जनाएको छ । 

ललितपुर महानगरका प्रमुख (मेयर) चिरीबाबु महर्जनले स्वास्थ्य बीमा महानगरले नगरबासीलाई दिएको उपहार भएको बताए । केन्द्रको उद्घाटन गर्दै उनले नेपालकै उत्कृष्ट अस्पताल र मुलुककै जेठो नगरपालिकाबीचको समझदारी तथा सहकार्यबाट महानगरबासीले उत्कृष्ट सेवा प्राप्त गर्ने विश्वास व्यक्त गरे । 

‘पाटन अस्पतालसँगको सहकार्यले कोभिडको समयमा उत्कृष्ट काम गर्न सक्यौँ,’ उनले भने, ‘अब मुलुककै लागि उदाहरणीय बन्ने गरी स्वास्थ बीमामार्फत उपचार सेवाको काम अगाडि बढेको छ ।’ 

महानगरले शिक्षा र स्वास्थ्य क्षेत्रलाई प्राथमिकतामा राखेको मेयर महर्जनले स्पष्ट पारे । महानगरमा स्वास्थ्य बीमा कार्यक्रम केही ढिला भएपनि ढिला भएको अनुभूति नहुने गरी सेवा प्रवाह हुने उनले दाबी गरे । उनले केन्द्रमा जनशक्तिदेखि उपकरणसम्म कुनै क्षेत्रमा कमी कमजोरी हुन नदिने प्रतिबद्धता पनि व्यक्त गरे । 

पाटन स्वास्थ्य विज्ञान प्रतिष्ठानका उपकुलपति डा राजेशलाल डंगोलले स्वास्थ्य बीमा कार्यक्रममार्फत प्रवाह हुने सेवाले नागरिकको खर्च घटाउन र रोगका कारणले ऋणको भारी बोक्नुपर्ने अवस्था अन्त्य गर्न सहयोग गर्ने बताए । उनले बीमा कार्यक्रममार्फत प्रवाह हुने सेवामा नगरवासीलाई निराश हुने अवस्था आउन नदिने प्रतिबद्धता जनाए ।

बीमा बोर्डका कार्यकारी निर्देशन दामोदर बसौलाले २०७२ चैत २५ गते कैलालीबाट शुरू भएको स्वास्थ्य बीमा कार्यक्रम हाल देशका ७५३ वटै पालिकामा सञ्चालन भएको जानकारी गराए । उनले स्वास्थ्य बीमा शुरू गर्नुभन्दा गुणस्तरीय सेवा पाउने कुरा महत्वपूर्ण भएको बताए । 

ललितपुर महानगर स्वास्थ्य बीमा सम्पर्क व्यक्ति दाताराम अधिकारीले यल स्वास्थ्य केन्द्रमा अहिले कर्मचारी र चिकित्सकसहित ५६ जनाको व्यवस्था भएको जानकारी गराए । आपतकालीन र बहिरङ्ग सेवामा पाँच–पाँच शय्या रहेको स्वास्थ्य सेवा केन्द्रबाट दैनिक पाँच विशेषज्ञ सेवासहित २४ घन्टा सेवा प्रदान गरिने छ । जनरल मेडिसिन, जनरल सर्जरी, प्रसुति, बालस्वास्थ्य र हाडजोर्नीको विशेषज्ञ सेवा प्रदान गर्ने महानगरले जनाएको छ ।