स्पेनले १६ वर्षको लामो प्रतीक्षा अन्त्य गर्दै फुटबल विश्वकपको उपाधि चुमेको छ । अमेरिकाको न्यूयोर्कस्थित न्यू जर्सी स्टेडियममा सम्पन्न रोमाञ्चक फाइनल भिडन्तमा साबिक विजेता अर्जेन्टिनालाई एक्स्ट्रा टाइममा १–० गोल अन्तरले पराजित गर्दै स्पेनले २०२६ को विश्वकप ट्रफी आफ्नो नाममा गरेको हो ।

स्पेनका लागि एक्स्ट्रा टाइमको १०६औँ मिनेटमा फेरन टोरेसले गरेको एक मात्र गोल नै जितका लागि निर्णायक बन्यो। यसअघि सन् २०१० मा नेदरल्याण्ड्सलाई १–० ले नै हराएर पहिलो पटक विश्वकप जितेको स्पेनको यो दोस्रो विश्वकप उपाधि हो।

नियमित ९० मिनेटको खेल शून्य-शून्यको बराबरीमा सकिनुको मुख्य श्रेय अर्जेन्टिनाका गोलकिपर एमिलियानो मार्टिनेजलाई जान्छ। पूरा म्याचभरि स्पेनले लगातार आक्रमणको वर्षा गरिरह्यो। लामिन यमालले बक्स बाहिरबाट हानेको प्रहार होस् या मिकेल ओयारजाबाल, पेड्री र निको विलियम्सका उत्कृष्ट प्रयासहरू मार्टिनेजले हरेक पटक आफूलाई बल र गोलपोस्टको बिचमा ढाल बनेर उभ्याए।

तर, एक्स्ट्रा टाइममा अर्जेन्टिनालाई ठुलो धक्का लाग्यो। खेलको अन्तिम समयतिर इन्जुरी टाइममा पाउ क्युबार्सीमाथि खराब ट्याकल गरेपछि एन्जो फर्नान्डेजले दोस्रो पहेँलो कार्ड (रेड कार्ड) खाँदै मैदान छाड्न बाध्य भए। १० खेलाडीमा सीमित बनेपछि अर्जेन्टिनामाथि स्पेनको दबाब झन् बढाउँदै लग्यो।

१०३औँ मिनेटमा निको विलियम्सको क्रसमा मिकेल मेरिनोको हेडर थोरैले बाहिरियो। तर, त्यसको तीन मिनेटपछि अर्थात् १०६औँ मिनेटमा देब्रे फ्ल्याङ्कबाट पुगेका निको विलियम्सले ब्याक पोस्टमा हेडरमार्फत बल फेरन टोरेसको सामुन्ने खसाले। टोरेसले बिना कुनै ढिलाइ दायाँ खुट्टाले यस्तो कडा प्रहार गरे कि मार्टिनेजले बचाउने कुनै अवसर नै पाएन्न र बल सिधै नेटमा पुग्यो।

यो फाइनल दुई फरक पुस्ताबिचको भिडन्त पनि थियो। एकातिर ३९ वर्षीय भेट्रान स्टार लियोनेल मेसी थिए भने अर्कोतिर २० वर्षीय युवा सनसनी लामिन यमाल। स्पेनको बलियो मिडफिल्ड र डिफेन्सले मेसीलाई खुलेर खेल्ने कुनै मौका दिएन। अर्कोतर्फ, यमालले लगातार अर्जेन्टिनाको डिफेन्स लाइनलाई व्यस्त राखिरहे।

स्पेनले आफ्नो परम्परागत शैली 'बल पोसेसन' माथि नै नियन्त्रण कायम राख्यो। रोड्रीले मिडफिल्डमा खेलको गति तय गरे भने अर्जेन्टिनालाई काउन्टर अट्याकको मौका नै दिइएन। स्पेनले खेलको करिब ६५ प्रतिशत समय बल आफ्नो कब्जामा राखेको थियो।

रेफ्रीको अन्तिम सिट्ठी बज्नेबित्तिकै स्पेनिस खेलाडीहरू मैदानमा दोडिए। कोही भुइँमा घुँडा टेकेर रोए भने कोही एकअर्कालाई अँगालो हाल्दै खुसीयाली मनाउन थाले। अर्कोतर्फ, अर्जेन्टिनाका खेलाडीहरू निराशामा डुबेका थिए। खेल सकिएलगत्तै दुवै टोलीका खेलाडीहरूबीच केही बेर भनाभन र नोकझोंक भए पनि स्थिति चाँडै साम्य भएको थियो। 
विश्वकपमा फ्रान्सका किलियन एमबाप्पेले १० गोल र ४ असिस्ट गर्दै 'गोल्डेन बुट' जिते। अर्जेन्टिनाका लियोनेल मेसी ८ गोल र ४ असिस्टका साथ दोस्रो स्थानमा रहे।

स्पेनको विश्वकप यात्रा भने सुखद शुरूआत भएको थिएन। समूह चरणको पहिलो खेलमा केप भर्डेसँग बराबरीमा रोकिएको स्पेनले त्यसपछि उत्कृष्ट पुनरागमन गर्‍यो। समूह चरणमै साउदी अरबलाई ४–० र उरुग्वेलाई १–० ले हराउँदै नकआउटमा पुगेको स्पेनले अस्ट्रिया, पोर्चुगल, बेल्जियम र फ्रान्स जस्ता बलिया टोलीहरूलाई पछाडि पार्दै उपाधि चुम्न सफल भयो।