फिनल्याण्ड फेरि विश्वकै खुसी राष्ट्र: भारत-पाकिस्तानभन्दा नेपालअगाडि, अफगानिस्तान पुछारमा

आज विश्वभर अन्तर्राष्ट्रिय खुशी दिवस मनाइँदै छ। संयुक्त राष्ट्रसङ्घको हरेक वर्षको मार्च २० तारिखमा अन्तर्राष्ट्रिय खुसी दिवस मनाउँदै आएको छ । यो दिवस मानिसले खुशी हुन पाउनु अधिकार हो भनेर मनाउन शुरू गरिएको हो । 

सन् २०११ मा संयुक्त राष्ट्र संघको महासभाले एक प्रस्ताव पारित गर्दै खुसीलाई आधारभूत मानव लक्ष्य बनाएको हो । यो प्रस्ताव आएको दुई वर्षपछि सन् २०१३ मा राष्ट्र संघका १९३ सदस्य राष्ट्रले एकसाथ अन्तर्राष्ट्रिय खुशी दिवस मनाएका थिए । त्यसयता हरेक वर्षको मार्च २० मा यो दिवस मनाइन्छ ।

यसैबीच फिनल्याण्ड फेरि विश्वको सबैभन्दा खुसी राष्ट्र बनेको छ । ग्यालप, अक्सफोर्ड वेलबिङ रिसर्च सेन्टर, संयुक्त राष्ट्र संघको दिगो विकास समाधान नेटवर्क र सम्पादकीय बोर्डको साझेदारीमा तयार पारिएको वर्ल्ड ह्यापिएस्ट रिर्पोटअनुसार फिनल्याण्ड विश्वकै खुसी राष्ट्रको सूचीमा एक नम्बरमा परेको हो । 

फिनल्याण्डका नर्डिक छिमेकीहरू पनि शीर्ष खुसी देशहरूमा परेका छन् । डेनमार्क (२), आइसल्याण्ड (३) र स्वीडेन (नम्बर ४) शीर्ष पाँच खुसी देशमा परेका हुन् । पाँचौमा इजरायल छ भने नेदरल्याण्ड्स छैठौमा परेको छ । यस्तै, नर्बे खुसी राष्ट्रहरूको सूचीमा सातौ नम्बरमा छ । लग्जम्बर आठौ, स्वीजरल्याण्ड नौऔं र अस्ट्रेलिया दशौं नम्बरमा परेका छन् । 

न्यूजिल्याण्ड, कोस्टारिका, कुवैत, अस्ट्रिया, क्यानडा, बेल्जियम, आयरल्याण्ड, चेसिया, लिथुनिया र यूएसए क्रमश: एघारौंदेखि विश्वका बिसौं खुसी राष्ट्रमा परेका छन् ।

सिंगापुर ३० औ नम्बरमा छ भने जापान ५१ औं नम्बरमा छ । थाइल्याण्ड ५८, मलेसिया ५९ र चीन ६० औं नम्बरमा छ । 

१४३ देशहरूको सूचीमा नेपाल ९३ औं स्थानमा छ । नेपालभन्दा भारत धेरै पछि छ । भारत खुसी राष्ट्रको सूचीमा १२६औं स्थानमा छ भने पाकिस्तान भारतभन्दा पनि अगाडि छ । पाकिस्तान १०८औं नम्बरमा छ । श्रीलंका १२८ औं नम्बरमा छ । 

सबैभन्दा पुछारमा अफगानिस्तान छ । अफगानिस्तानपछि सबैभन्दा कम खुसी हुने राष्ट्रको सूचीमा लेबनान दोस्रोमा छ ।

हेर्नुहोस् खुसी देशहरूको सूची