अमेरिकाको बाल्टिमोरस्थित एक पुलमा कार्गो जहाज ठोकिएर दुर्घटना हुँदा ठूलो क्षति भएको छ ।

पुलमा ठोकिएर क्षतिग्रस्त भएको डली नामको जहाज ९ सय ४८ फिट लामो कार्गो जहाज हो । सिङ्गापुरको झण्डा बोकेको उक्त जहाज स्थानीय समयअनुसार मंगलवार बिहान १ बजेर ३० मिनेट जाँदा पुलको पिलरमा ठोक्किएर दुर्घटना भएको हो । 

स्थानीय अधिकारीहरूले ठूलो क्षतिको आशंका गरे पनि क्षतिको विवरण भने सार्वजनिक गरिएको छैन । 

अमेरिकी स्थानीय सञ्चारमाध्यमद्वारा प्रसारित एक भिडियोमा पुल भाँचिएको, सवारी साधन र मानिससँगै पानीमा डुबेको देखाइएको छ ।

राजमार्गको प्रमुख अंश रहेको 'फ्रान्सिस स्कट की ब्रिज' नामको उक्त पुल ३ किलोमिटर लामो रहेको छ । उद्धारकर्ताहरूले हराइरहेका यात्रुको खोजी गरिरहेका छन् । उद्धार कार्यमा सामेल अधिकारीका अनुसार अहिलेसम्म २ जनालाई पानीबाट निकालिएको छ । 

बाल्टिमोरको दमकल विभागका अनुसार जहाज स्थानीय समय अनुसार राति १ बजेर ३० मिनेट जाँदा पुलसँग ठोकिएको थियो । 

अमेरिकी अधिकारीहरूले जहाज जानाजानी ठोकिएको संकेत नदेखिएको बताएका छन् । उक्त पुल नजिकै रहेको बाल्टिमोर बन्दरगाह अमेरिकाकै सबैभन्दा ठूलो कार्गो बन्दरगाह हो ।