गुल्मीको सत्यवती गाउँपालिका ४ लिम्घामा मलामी बोकेको जीप शनिबार राति दुर्घटनामा परेकोे छ । दुर्घटनामा एक जनाको मृत्यु भएको छ भने १२ जना घाइते भएका छन् ।

लिम्घाको मौरीओडारस्थित शाहाघाट लिम्घा भित्री सडक खण्डमा रुद्रवेणीबाट मलामी लिएर लिम्घातर्फ फर्किरहेको लु १ च ४३२० नम्बरको पिकअप जीप दुर्घटनामा परेको हो । 

दुर्घटनामा स्थानीय ७५ वर्षीय मनबहादुर फुम्जालीको मृत्यु भएको जिल्ला प्रहरी कार्यालय गुल्मीका प्रवक्ता प्रहरी नायव उपरीक्षक शंकर पोख्रेलले जानकारी दिए । 

गाडीको ब्रेक फेल भएर सडकदेखी ४० मिटर तल खसेको छ । 

दुर्घटनामा परेर घाइते हुनेमा अधिकांश सत्यवतीका रहेका छन् । घाइते चार जनाको पाल्पा र अरुको स्थानीय अस्पतालमा उपचार भइरहेको प्रहरीले जनाएको छ ।