अन्तर्राष्ट्रिय नेपाली साहित्य समाज (अनेसास)ले आगामी निर्वाचन २०२४–०२६ का लागि निर्वाचन तालिका सार्वजनिक गरेको छ । गुणराज लुइटेल संयोजक रहेको अनेसास निर्वाचन समिति २०२४–०२६ ले नतिजा सार्वजनिक गरेको हो ।

निर्वाचन तालिका सार्वजनिक गर्नुअगावै विभिन्न पदका लागि विभिन्न दावेदारहरूले उम्मेदवारी घोषणा गरिसकेका छन् । 

अहिले अनेसास निर्वाचन २०२४–०२६ का लागि अध्यक्ष पदमा वर्तमान महासचिव विमला निरौलाले र वरिष्ठ उपाध्यक्ष सर्वज्ञ वाग्लेले घोषणा गरेका छन् । यसअघि लालगोपाल सुवेदीले पनि अध्यक्ष पदका लागि उम्मेदवार घोषणा गरेका थिए । यद्यपि उनले आफूले अध्यक्ष नभई वरिष्ठ उपाध्यक्षका लागि चुनावमा उत्रने जानकारी उनकै फेसबुकमार्फत् जानकारी गराएका छन् ।

उम्मेदवारी घोषणासँगै आजीवन सदस्यहरूले बधाई शुभकामना व्यक्त गरेका छन् । 

अनेसासको पाँचओटा उपाध्यक्षमा महत्वपूर्ण रूपमा हेरिने अमेरिका उपाध्यक्षका लागि वोस्टन च्याप्टरका अध्यक्ष महेश्वर पन्त र वर्तमान केन्द्रीय कार्यसमितिका सदस्य सुदीपभद्रले उम्मेदवारी घोषणा गरेका छन् । 

त्यस्तै एसिया उपाध्यक्षका लागि कोरियाका प्रमोद सारंग, जापानबाट दिनेशराज ज्ञवाली र नेपालबाट सरिता अर्यालले उम्मेदवार घोषणा गरेका छन् ।

त्यस्तै युरोपबाट उपाध्यक्षका लागि डिल्ली अम्माइले उम्मेदवारी घोषणा गरेका छन् भने ओसियानाबाट प्रत्यक्ष रुपमा घोषण भइनसकेको जानकारी रहेको छ ।

अनेसासको महासचिव पदका लागि कोलोराडो च्याप्टरका अध्यक्ष राजु सिटौला र निवर्तमान अनेसास कोषाध्यक्ष निलुकृष्ण गिरीले उम्मेदवारी घोषणा गरेका छन् । त्यस्तै सचिव पदका लागि युरोपका एनबी अन्जान र  अनेसास केन्द्रीय सदस्य तारा अधिकारीले उम्मेदवारी घोषणा गरेकी छन् । सदस्य पदका लागि हालसम्म उम्मेदवारी घोषणा भएको जानकारी प्राप्त भएको  छैन ।

यस्तो छ निर्वाचन तालिका
मतदाता सूची प्रकाशन : जून ५, २०२४ बुधबार (inls.org) मा
• अन्तिम मतदातासूची प्रकाशन जून ६, २०२४ बिहीबार
• उम्मेदवारी दर्ता : जून २२ शनिवारदेखि जून २४, २०२४ सोमबारसम्म
• उम्मेदवारी फिर्ता लिनसक्ने जून २६, २०२४ बुधबार
• अन्तिम उम्मेदवारहरूको नामावली प्रकाशन जून २८, २०२४ शुक्रबार
• चुनावी अभियान र प्रचारप्रसार जून २८ शुक्रबारदेखि जूलाई ३, २०२४ बुधबारसम्म
• चुनावी मौन अवधि जुलाई ४ राति १२ बजेदेखि जूलाई ५ राति ११: ५९ बजेसम्म
• मतदान समयः जुलाई ६, १२ बजे देखि जुलाई ७ राति ११: ५९ सम्म
• चुनावी नतिजा घोषणा : जुलाई ८, २०२४ सोमबार
उम्मेदवारी घोषणा सँगसँगै आजीवन सदस्यहरूले बधाई शुभकामना व्यक्त गरेका छन् । मतदाताले घोषणा गरेका उम्मेदवारलाई बधाई तथा शुभकामना दिनु स्वाभाविक पनि हो र मतदाताले पक्ष विपक्षमा आआफ्नो धारण व्यक्त गर्नु स्वाभाविक पनि हो । तर उम्मेदवारबाहेकका वर्तमान केन्द्रीय कार्यसमितिका अन्य पदाधिकारी वा सल्लाहकारले नै खुलेर एकपक्षका विषयमा बोल्नुलाई चुनावको निष्पक्षतामा शंका गर्न थालेका छन् अनेसासका आजीवन सदस्यहरू ।