कालीमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलनबारे अनुसन्धान गरिरहेको काठमाडौं प्रहरीले एक/दुई दिनमै पूर्वडीआईजी छविलाल जोशी बञ्जाडेलाई बयानका लागि काठमाडौं ल्याउने तयारी थालेको छ ।

यसअघि कास्कीबाट ल्याइएका स्वर्णलक्ष्मीका कोषाध्यक्ष रहेका कुमार रम्तेलसँग प्रहरीले बयान लिइसकेको छ । सरकारी वकिल कार्यालय काठमाडौंमा भएको बयानमा रम्तेलले इन्कारी बयान दिएका छन् । उनले गितेन्द्रबाबु (जीबी) राईले आफ्नो स्वीकृति बिना नै स्वर्णलक्ष्मीमा उपाध्यक्ष बनाएको बयान दिएका छन् । 

काठमाडौंमा बयान सकिएपछि उनलाई कास्की फिर्ता पठाएको छ । कास्कीमा प्रहरीले सूर्यदर्शन सहकारीको रकम अपचलनका विषयमा अनुसन्धान गरिरहेको छ । जसमा जोशी र रम्तेलसहित रास्वपा सभापति रवि लामिछाने पनि जोडिएका छन् । अनुसन्धानका लागि लामिछाने पनि कात्तिक २ गतेदेखि कास्की प्रहरीको हिरासतमा छन् । 

जिल्ला प्रहरी परिसर काठमाडौंका एक अधिकृतका अनुसार गोर्खा मिडिया नेटवर्कका तत्कालीन उपाध्यक्ष छविलाई स्वर्णलक्ष्मी सहकारी ठगी प्रकरणमा बयान लिन काठमाडौं झिकाउने प्रक्रिया भइरहेको छ । छविको बयान सकिएपछि मात्रै रवि लामिछानेलाई काठमाडौं ल्याउने तयारी प्रहरीको छ । 

काठमाडौंको स्वर्णलक्ष्मी, पोखराको सूर्यदर्शन, बुटवलको सुप्रिम, चितवनको सहारा र पर्साको सानो पाइलालगायतका सहकारी संस्थाबाट गोर्खा मिडिया नेटवर्कमा गैरकानूनी रूपमा ६५ करोड ५४ लाख रूपैयाँ गएको अनुसन्धानबाट खुलेको छ। 

काठमाडौं जिल्ला अदालतबाट आइतबार मात्रै रवि र छविविरुद्ध पक्राउ पुर्जी जारी भइसकेको छ ।  ‘पहिला छविलाई बयानका लागि झिकाउँछौं, उनको बयान सकिएपछि मात्रै रविलाई ल्याउँछौं,’ परिसरका एक अधिकृतले लोकान्तरसँग भने,‘गाडी खरिदका लागि स्वर्णलक्ष्मीबाट रविले ऋण लिएको देखिन्छ ।’ 

रवि र उनका व्यापारिक साझेदार जीबीराई को संयुक्त नाममा गाडी खरिद गरिएको थियो । जीबी र रविका नाममा २०७८ पुस १ मा ‘इको सेभेन सिटर भ्यान’ किन्न भन्दै सहकारीबाट ४६ लाख ८८ हजार लगेको खुलेको छ। 

भ्यान किन्न भनेर लगेको कर्जामध्ये २९ लाख ५२ हजार ४ सय ३६ रूपैयाँ तिर्न बाँकी देखिएको छ। २०७८ साउन ४ मा पनि सोही सहकारीबाट गोर्खा मिडियाका अध्यक्ष राई र प्रबन्ध निर्देशक लामिछानेले ‘फोर ह्विलर’ गाडी किन्न ४६ लाख ९८ हजार कर्जा लगेको देखिएको छ। 

गाडी किन्दा लिएको ऋणमध्ये ३२ लाख २१ हजार ६ सय ३३ रूपैयाँ ५१ पैसा तिर्न बाँकी देखिन्छ।

कात्तिक २ गते पक्राउ परेका रवि ३४ दिनदेखि प्रहरी हिरासतमा छन् । उनलाई यसअघि बुटवलको सुप्रिम सहकारी ठगी प्रकरणमा बयानका लागि रुपन्देही लगिएको थियो । रुपन्देहीमा बयान सकेर उनलाई कास्की नै फिर्ता पठाइएको छ ।