नयाँ विकास र पुराना पूर्वाधार स्तरोन्नति गर्न त्यसलाई खनेर महिनौंसम्म अलपत्र पारिनु नेपालको आम समस्या नै हो । स्तरोन्नतिको नाममा खनिएका सडक वर्षौंसम्म धुलाम्मे हुँदा पनि कसैको ध्यान पुगेको हुँदैन ।

तर, यहीँ यस्तो काम पनि भइरहेको छ, जहाँ साँझ खनेको ठाउँमा भोलिपल्ट बिहान पिच भइसक्छ । हजुर, हामी कुरा गर्दैछौं त्रिभुवन अन्तर्राष्ट्रिय विमानस्थल स्तरोन्नतिका लागि भइरहेको कामको ।

दैनिक १० घण्टा उडान बन्द गरेर विमानस्थल स्तरोन्नतिको काम धमाधम भइरहेको छ । राति १० बजेदेखि बिहान ८ बजेसम्म विमानस्थल बन्द गरेर दक्षिण–पश्चिमतर्फ समानान्तर ‘ट्याक्सी वे’, उत्तरतर्फ ‘इन्टरनेसनल एप्रोन’ र पूर्वतर्फ ‘ह्यांगर एप्रोन’ विस्तारको काम भइरहेको हो । 

विमानस्थल बन्द भएलगत्तै निर्माण सामग्रीसहित प्राविधिक टोलीहरू काममा खटिन्छन् । रातभर काम गरेर बिहान विमान उडाउने समयसम्म पुनः जस्ताको त्यस्तै बनाइसक्नुपर्छ । 

अर्थात्, निर्माणको काम गर्दा रनवेमा एउटा सानो ढुंगा पनि देखिनु हुँदैन । 

रनवेबाट दायाँबायाँ ७५ मिटर दूरीसम्मको क्षेत्र अति संवेदनशील भएकाले सुरक्षा संवेदनशीलतालाई विचार गरी सो क्षेत्रभित्र काम गरिरहेको विमानस्थल स्तरोन्नति आयोजना प्रमुख दीपक श्रेष्ठले बताए ।

रनवेको ७५ मिटर क्षेत्रमा खटाइएका निर्माण उपकरण बिहान ८ बजेसम्म खालि भइसक्ने उनले जानकारी दिए ।

‘अहिले तीन ठाउँमा काम गर्नका लागि विमानस्थल पूर्णरूपमा बन्द गर्नुपरिरहेको छ । ७५ मिटरभित्र अर्थात् ट्याक्सी वे, इन्टरनेसनल एप्रोन र ह्यांगर एप्रोनको काम निकै संवेदनशील र सुरक्षाका दृष्टिकोणले पनि चुनौतीपूर्ण रहेको छ’, उनले भने, ‘यहाँ काम गर्दा जमिनभित्र रहेका वायरहरू र बाहिरका संरचनाहरूमा कुनै पनि परिवर्तन अथवा क्षति पुग्नु हुँदैन । यदि एउटा केबल मात्रै काटिएमा बिहान पूरै विमानस्थल चल्न नसक्ने अवस्था हुन्छ । त्यसैले तीव्र गतिमा पनि काम गरिरहेका छौं र सुरक्षामा त्यत्तिकै ध्यान दिइरहेका छौं ।’

रनवेको ७५ मिटरभित्र पर्ने संवेदनशील क्षेत्रमा काम गर्न २०० जना जनशक्ति खटाइएको छ । यसबाहेकका क्षेत्रमा भने दिनरात काम हुँदैछ ।

सोमबार मध्यरातमा संस्कृति, पर्यटन तथा नागरिक उड्डयन मन्त्री बद्री पाण्डे स्तरोन्नतिको काम अवलोकनका लागि विमानस्थलमा पुगे । राति ११ बजेदेखि १ बजेसम्म मन्त्री पाण्डेले विमानस्थल स्तरोन्नतिका लागि भइरहेको काम अवलोकन गरे ।

ट्याक्सी वे, इन्टरनेसनल एप्रोन र ह्यांगर एप्रोन विस्तारको काम अवलोकन गरेपछि मन्त्री पाण्डेले तोकिएको समयभित्रै काम सम्पन्न हुने देखिएको बताए । विमानस्थल विस्तारको काम तीव्र गतिमा भइरहेको र तोकिएको समयमा नै सम्पन्न हुने उनको भनाइ छ । 

‘विमानस्थल स्तरोन्नतिको काम तोकिएको समयभित्रै सम्पन्न हुने देखिएको छ । प्राविधिक टोलीहरूले निकै प्रशंसाजनक काम गरिरहनुभएको छ । समयमै काम सम्पन्न भएमा यसको लागत पनि नबढ्ने देखिएको छ’, मन्त्री पाण्डेले भने, ‘निर्माण व्यवसायी र प्राविधिक टोलीले स्तरोन्नतिको काम गरिरहेका छन् । ठूलो जनशक्ति जसरी परिचालित भएर काम गरिरहेका छन्, त्यो प्रशंसा गर्न योग्य छ । विमानस्थल १० घण्टा बन्द हुँदा आलोचना खेप्नुपरेको छ । त्यस अनुसारको काम पनि भएको देखियो ।’

ट्याक्सी वे, इन्टरनेसनल एप्रोन र ह्यांगर एप्रोनको काम ७५ मिटरभित्र भइरहेको छ । त्यसैले विमानस्थल बन्द गर्नुपरेको हो । ७५ मिटरभन्दा बाहिरको कामका लागि दिनरात नै काम भइरहेको जनाइएको छ । 

यसका साथै आठ स्थानमा नयाँ एक्जिट ट्याक्सी वे बनाउने काम भइरहेको छ । अन्तर्राष्ट्रियतर्फ जहाज पार्किङ क्षमता बढाएर १८ वटा अन्तर्राष्ट्रिय जहाज पार्किङ गर्ने क्षमता बनाउन लागिएको छ ।