२९ असार २०८३, सोमबार
नेकपा (माओवादी केन्द्र) निकटको अखिल क्रान्तिकारीको अध्यक्षमा पार्टी अध्यक्ष पुष्पकमल दाहाल प्रचण्डनिकटका उम्मेदवार विजयप्रकाश सापकोटा र उपमहासचिव जनार्दन शर्माका उम्मेदवार हेमन्त राईबीच कडा टक्कर देखिएको छ ।
गणना भइसकेका ६ प्रदेश र अन्तिममा पुगेर विवाद आएको मधेश प्रदेशको अहिलेसम्मको गणनामा सापकोटा २२ मतले अगाडि देखिएका हुन् ।
सापकोटाले ४७३ मत पाएका छन् । उनलाई पछ्याउँदै कडा टक्कर दिइरहेका राईले ४५१ मत प्राप्त गरेका छन् । हेडक्वार्टरका उम्मेदवार सापकोटाले कोशीबाट ४९, मधेशबाट ४०, बागमतीबाट ८७, गण्डकीबाट ६०, लुम्बिनीबाट ८५, कर्णालीबाट ८० र सुदूरपश्चिम प्रदेशबाट ७२ गरी ४७३ मत प्राप्त गरेका छन् ।
जनार्दन निकटका हेमन्त राईले कोशीबाट ११६, मधेशबाट ४१, बागमतीबाट ४८, गण्डकीबाट ३९, लुम्बिनीबाट ६६, कर्णालीबाट ८२ र सुदूरपश्चिमबाट ५९ गरी ४५१ मत प्राप्त गरेका छन् ।
वरिष्ठ उपाध्यक्ष नारायणकाजी श्रेष्ठनिकटका उम्मेदवार उपदेश यादवले २०५ मत ल्याएका छन् ।
उनले कोशीबाट ३५, मधेशबाट ६७, बागमतीबाट ५१, गण्डकीबाट १५, लुम्बिनीबाट १०, कर्णालीबाट ५ र सुदूरपश्चिम २२ गरी २०५ मत प्राप्त गरेका छन् ।
क्रान्तिकारीको मतगणनामा अर्का उपमहासचिव वर्षमान पुनका उम्मेदवार सुदिन पौडेल कमजोर देखिएका छन् । उनले १४३ मत मात्रै ल्याएका छन् ।
पौडेलले कोशीबाट १८, मधेशबाट १, बागमतीबाट १७, गण्डकीबाट ६१, लुम्बिनीबाट २२, कर्णालीबाट ८ र सुदूरपश्चिम १६ गरी १४३ ल्याएका छन् ।
तर, मधेशमा खसेको १९५ मतमध्ये ४ मत कम देखिएको भन्दै विवाद झिकिएको छ । मधेशमा उपदेशले सबैभन्दा बढी ६७ मत पाउँदा सापकोटाले ४० र राईले ४१ मत प्राप्त गरेका छन् ।
सापकोटा पक्षको मत कम आएपछि यही पक्षले मतपत्रमा पानी हालेका कारण विवाद भएको अर्को पक्षको आरोप छ । त्यसपछि दुवै पक्षले पुनः मतदानको माग गरेका छन् ।
अब गणना हुन बाँकी विश्वविद्यालय र विशेष प्रदेशमा पनि विवाद भएको छ ।
बाल्मिकी क्याम्पसमा मतगणनाको तयारी भइरहँदा मतपत्रमा रातो र नीलो मसीको कारणले विवाद भएको हो ।
निर्वाचनमा रातो मसी प्रयोग भएको थियो । तर, गणनाको प्रारम्भमै केही मतपत्रमा नीलो मसी देखिएपछि विवाद भएको एक नेताले जानकारी दिए ।
प्रदेशहरूमध्ये सबैभन्दा बढी मतदाता यी दुईमा रहेका छन् । जसमा विशेषमा २६४ र विश्वविद्यालयमा २५८ मत खसेको थियो ।
कडा टक्करबीच यी दुई ठाउँको गणनाले नै अध्यक्षको छिनोफानो हुने देखिएको छ । हेडक्वार्टरनिकटका हिमाल शर्मा, पञ्चा सिंहसहितका नेता पनि यही प्रदेशका हुन् । उनीहरूको समेत प्रभाव रहेकाले यी दुई प्रदेशको गणनालाई रोचक मानिएको छ ।
दुवै ठाउँमा मतगणनाका लागि निर्वाचन समितिले छलफल गरिरहेको निवर्तमान अध्यक्ष पञ्चा सिंहले जानकारी दिइन् ।
‘दुईवटा कलम प्रयोग भएपछि हिजोदेखि नै विवाद सिर्जना भएको थियो । तर, निर्वाचन समितिले मिलाउने प्रयत्न गरिरहेको छ । छलफल जारी छ । अब केही समयमा गणनामा जान्छ होला,’ सिंहले लोकान्तरसँग भनिन्, ‘मधेशमा अध्यक्षमा ठूलो विवाद छैन । अध्यक्षको मत गणना भइसकेपछि केही विवाद आउन खोजे पनि अहिले साम्य हुने क्रममा छ ।’
