ट्रम्प प्रशासनले अमेरिकामा एउटा नयाँ कार्यक्रम शुरू गर्ने घोषणा गरेको छ, जसअन्तर्गत अमेरिकीहरूले आफ्ना व्यक्तिगत स्वास्थ्य तथ्यांक र चिकित्सकीय अभिलेख निजी प्रविधि कम्पनीहरूले सञ्चालन गर्ने स्वास्थ्य प्रणाली र एप्समार्फत साझेदारी गर्न सक्नेछन् । यस कार्यक्रमले स्वास्थ्य अभिलेखहरूलाई सजिलैसँग पहुँचयोग्य बनाउने र स्वास्थ्य अवस्थाको निगरानी गर्न सहज सहज हुने बताइएको छ ।

गुगल, अमेजन र एपलजस्ता ठूला प्रविधि कम्पनीहरू तथा युनाइटेड हेल्थ ग्रुप र सीभीएस हेल्थजस्ता स्वास्थ्य सेवा प्रदायक गरी ६० भन्दा बढी कम्पनीले यस प्रणालीमा बिरामीहरूका तथ्यांक शेयर गर्न सहमति जनाएका छन् ।

यो पहल मधुमेह, तौल व्यवस्थापन, बिरामीलाई सहयोग गर्ने वार्तालाप-आधारित कृत्रिम बुद्धिमत्ता र क्युआर कोड तथा बिरामीलाई चेक-इन वा औषधि ट्र्याक गर्न मद्दत गर्ने एप्सजस्ता डिजिटल उपकरणमा केन्द्रित हुनेछ ।

अमेरिकी राष्ट्रपति डोनाल्ड ट्रम्पले स्वास्थ्य प्रणालीलाई डिजिटल युगमा लैजान लागिएको बताए ।

'दशकौंदेखि अमेरिकाको स्वास्थ्य सेवा नेटवर्क उच्च प्रविधिमा स्तरोन्नतिका लागि ढिला भइसकेको छ,' राष्ट्रपति डोनाल्ड ट्रम्पले बुधवार ह्वाइट हाउसमा कम्पनीका सीईओहरूसँगको कार्यक्रममा भने, 'अहिलेसम्मका प्रणालीहरू प्रायः ढिलो, महंगो र एकअर्कासँग असंगत छन् । तर, आजको घोषणासँगै हामी स्वास्थ्य सेवालाई डिजिटल युगमा लैजान ठूलो कदम चालिरहेका छौं ।'

गोपनीयताको चिन्ता

अमेरिकीहरू व्यक्तिगत गोपनीयताको विषयमा एकदमै चिन्तित रहन्छन् । यो प्रविधि कार्यान्वयनमा आएपछि गोपनीयताको विषयमा के हुने भन्ने चिन्ता अहिलेदेखि नै व्यक्त हुन थालेको छ ।

'ठूलै नैतिक र कानूनी चिन्ताहरू छन्,' सार्वजनिक स्वास्थ्यमा विशेषज्ञ जर्जटाउन विश्वविद्यालयका कानून प्राध्यापक लरेन्स गोस्टिनले भने, 'अमेरिकाभरका बिरामीहरूले उनीहरूका चिकित्सकीय अभिलेखहरू तिनीहरू र तिनका परिवारलाई हानी पुर्‍याउने तरिकाले प्रयोग हुनेमा गम्भीर चिन्ता गर्नुपर्ने हुन्छ ।'

सुरक्षा र सहमतिका उपाय

मेडिकेयर र मेडिकेड सेवासम्बन्धी केन्द्रका अधिकारीहरूले (जसले यो प्रणाली सञ्चालन गर्नेछन्) बिरामीहरूले आफ्ना चिकित्सकीय अभिलेख र तथ्यांक साझेदारी गर्नका लागि 'अप्ट-इन' गर्नुपर्ने र ती तथ्यांक सुरक्षित राखिने बताएका छन् ।

तिनीहरूले भनेका छन्, यस प्रणालीले बिरामीहरूलाई आफ्ना अभिलेख सजिलै पाउन मद्दत गर्नेछ, अघिसम्म फ्याक्स मशिन प्रयोग गर्नुपर्ने जस्ता झन्झटहरूका कारण यो असम्भवजस्तै भएको थियो ।

'हामी उपभोक्ताहरूले आफ्ना अभिलेखहरू प्रयोग गर्ने तरिकामा उल्लेखनीय प्रगति देख्नेछौं,' मेडिकेयर र मेडिकेड सेवाका प्रमुख डा. मेहमेत ओजले ह्वाइट हाउसमा आयोजित एक कार्यक्रममा भने ।

व्यावहारिक प्रयोग

प्रसिद्ध तौल घटाउने र फिटनेस सेवा नूम, जसले यस पहलमा हस्ताक्षर गरेको छ, उसले यो प्रणाली आगामी वर्षको शुरूआतमा शुरू भएपछि चिकित्सकीय अभिलेखहरू उपयोग गर्न सक्षम हुनेछ ।

यसमा प्रयोगशाला वा चिकित्सकीय परीक्षणहरू पनि पर्न सक्छन्, जसलाई प्रयोग गरेर एआईमा आधारित विश्लेषण विकास गरिनेछ, जसले प्रयोगकर्ताहरूलाई तौल घटाउन मद्दत गर्ने सीईओ जेफ कुकले असोसिएटेड प्रेसलाई बताए ।

एप्स र स्वास्थ्य प्रणालीहरूले आफ्ना प्रतिस्पर्धीहरूको जानकारीमा समेत पहुँच पाउनेछन् । उदाहरणका लागि नूमले एप्पल हेल्थबाट कुनै व्यक्तिको तथ्यांक प्रयोग गर्न सक्नेछ ।

'अहिले तपाईंसँग धेरै विखण्डित तथ्यांकहरू छन्,' कुकले भने ।

अस्पताललाई पनि सहज

'क्लिभल्यान्ड क्लिनिकमा उपचारका लागि देशभर यात्रा गर्ने बिरामीहरूले विभिन्न प्रदायकहरूबाट आफ्ना सम्पूर्ण चिकित्सकीय अभिलेखहरू प्राप्त गर्न गाह्रो हुने गरेको छ,' अस्पताल प्रणालीका सीईओ डा. टोमिस्लाभ मिहालेभिचले भने । उनले नयाँ प्रणालीले त्यो अवरोध हटाउने बताए, जसका कारण कहिलेकाहीँ उपचार ढिला हुने वा डाक्टरहरूले पूर्ण चिकित्सकीय इतिहास नभएकाले सही निदान गर्न नसक्ने अवस्था उत्पन्न हुने गर्छ ।

'खानेकुरा वा व्यायामबारे स्वास्थ्य एप्समा भण्डारण भएको जानकारीमा सहज पहुँचले डाक्टरलाई मोटोपन र अन्य दीर्घरोग व्यवस्थापनमा पनि मद्दत गर्नेछ,' मिहालेभिचले भने ।

'यी एप्सले हामीलाई बिरामीको स्वास्थ्यबारे चिकित्सकको कार्यालय बाहिर के भइरहेको छ भन्ने बुझ्न मद्दत गर्छन्,' उनले भने ।

सिफारिस र सेवा

सीएमएसले Medicare.gov मा ती एप्सको सूची सिफारिस गर्नेछ, जसले मानिसहरूलाई दीर्घरोग व्यवस्थापन गर्न र स्वास्थ्य सेवा प्रदायक वा बीमा योजना छान्न सहयोग गर्नेछ ।

डिजिटल गोपनीयतासम्बन्धी अभियन्ताहरू भने बिरामीका तथ्यांक सुरक्षित भण्डारण हुनेमा आश्वस्त छैनन् ।

तर, संघीय सरकारले स्वास्थ्य एप्स वा टेलिहेल्थ कार्यक्रमलाई नियमन गर्न धेरै कम काम गरेको छ, डिजिटल डेमोक्रेसी सेन्टरका जेफ्री चेस्टरले भने ।

स्वास्थ्य तथा मानव सेवा सचिव रोबर्ट एफ. केनेडी जुनियर र उनको समूहले स्वास्थ्य सेवामा प्रविधि बढाउने पक्षमा वकालत गर्दै वियरेबल उपकरणहरू र टेलिहेल्थलाई प्राथमिकता दिएका छन् ।

डाटा सङ्कलन र भविष्यका चिन्ता

केनेडीले अमेरिकीहरूका चिकित्सकीय अभिलेखबाट अझ धेरै तथ्यांक सङ्कलन गर्न खोजेका छन्, जुन उनले पहिले अटिजम र खोप सुरक्षाबारे अध्ययन गर्न प्रयोग गर्ने बताएका थिए ।

उनले स्वास्थ्य प्रविधि स्टार्टअप वा व्यवसायसँग काम गरेका कर्मचारीहरूलाई समेत एजेन्सीमा राखेका छन् ।

सीएमएससँग पहिल्यै मेडिकेयर र मेडिकेडमा दर्ता भएका १४ करोडभन्दा बढी अमेरिकीहरूका विशाल तथ्यांक छ । यसै महिनाको शुरूमा संघीय एजेन्सीले घरको ठेगानासहितको विशाल डाटाबेस निर्वासन अधिकारीहरूलाई बुझाउने सम्झौता गरेको थियो ।

नयाँ पहलले संघीय सरकार र प्रविधि कम्पनीहरूका लागि बिरामीहरूको जानकारीको भण्डार अझै बढाउनेछ । चिकित्सकीय अभिलेखमा सामान्यतया डाक्टर र बिरामीबीचको वार्ता वा पदार्थ दुरुपयोग तथा मानसिक स्वास्थ्य रेकर्डजस्ता अझ संवेदनशील जानकारी रहने गर्छ ।

'यो योजना संवेदनशील र व्यक्तिगत स्वास्थ्य जानकारीलाई अझ बढी प्रयोग र व्यावसायीकरण गर्ने खुला ढोका हो,' चेस्टरले भने ।

ट्रम्प प्रशासनले २०१८ मा यसभन्दा कम महत्त्वाकांक्षी इलेक्ट्रोनिक अभिलेख कार्यक्रम शुरू गर्ने प्रयास गरेको थियो, जुन उनको पहिलो कार्यकालमा प्रमुख प्रविधि कम्पनीहरूको साथ नपाउँदा सफल हुन सकेको थिएन ।

• एपीको सहयोगमा