अमेरिकी राष्ट्रपति डोनाल्ड ट्रम्पको धम्कीपछि गाजामा युद्धविराम गर्न हमास सहमत भएको छ । शुक्रबार राति हमासले राष्ट्रपति ट्रम्पको गाजा शान्ति योजनाअनुसार सबै बन्धकहरूको रिहाइको लागि तुरुन्तै वार्तामा प्रवेश गर्न सहमत भएको घोषणा गरेको हो ।

युद्ध अन्त्य गर्ने महिनौंको असफल प्रयासपछि यो सम्भावित सफलता हात लागेको हो  ।

अल जजीराको रिपोर्ट अनुसार, हमासको प्रतिक्रियामा हतियार आत्मसमर्पण गर्ने उल्लेख छैन । हमासको घोषणापछि, ट्रम्पले इजरायललाई गाजामा आफ्नो आक्रमण तुरुन्तै बन्द गर्न आह्वान गरेका छन् । इजरायलले अझै प्रतिक्रिया दिएको छैन ।

हमास सबै ४८ बन्धकहरूलाई रिहा गर्न इच्छुक छ । युद्धविराम लागू भएको ७२ घण्टाभित्र बन्धकहरूलाई रिहा गरिनेछ र बदलामा, २ हजार भन्दा बढी प्यालेस्टिनी सुरक्षा कैदीहरू र मारिएका गाजावासीहरूको शव फिर्ता गरिने समाचारमा उल्लेख छ ।

यसपछि, इजरायलले गाजाबाट आफ्नो फिर्ताको पहिलो चरण पूरा गर्नेछ। यद्यपि, हमासले यी सर्तहरूबारे थप विवरणहरू प्रदान गरेको छैन।

यसअघि, ट्रम्पले शुक्रबार हमासलाई आइतबारसम्म युद्धविराम योजना स्वीकार गर्न आग्रह गरेका थिए।