०५ साउन २०८३, मंगलबार
भारतीय प्रधानमन्त्री नरेन्द्र मोदीले सन् २०२६ लाई ‘आसियान–भारत समुद्री सहयोग वर्ष’ घोषणा गरेका छन् । भारत र आसियानबीच मानवीय सहायता, विपद् राहत तथा समुद्री सुरक्षा र नीलो अर्थतन्त्रमा सहयोग हुने उनले बताए ।
आसियान–भारत शिखर सम्मेलनलाई आइतबार भर्चुअल सम्बोधन गर्दै मोदीले भारत हरेक संकटमा आफ्ना आसियान साथीहरूसँग दृढतापूर्वक उभिएको बताएका हुन् ।
‘समुद्री सुरक्षा र नीलो अर्थतन्त्रमा हाम्रो सहयोग तीव्र गतिमा बढिरहेको छ । यसैलाई ध्यानमा राख्दै, हामी २०२६ लाई आसियान–भारत समुद्री सहयोग वर्ष घोषणा गर्दैछौं,’ मोदीले भने ।
२१ औं शताब्दी भारत र आसियानको शताब्दी भएको उल्लेख गर्दै मोदीले भने, ‘शिक्षा, पर्यटन, विज्ञान र प्रविधि, स्वास्थ्य, हरित ऊर्जा र साइबर सुरक्षामा द्विपक्षीय सहयोगलाई दृढतापूर्वक प्रवर्द्धन गर्दैछौं । यो भारत र आसियानको शताब्दी हो ।’
मोदीले मलेसियाका प्रधानमन्त्री अनवर इब्राहिमलाई आसियान शिखर सम्मेलनको सफल आयोजनाको लागि बधाई समेत दिए । आसियानलाई भारतको पूर्व नीतिको मुख्य स्तम्भ भन्दै मोदीले आसियान केन्द्रीयताको लागि नयाँ दिल्लीको समर्थन व्यक्त गरे ।
‘भारत र आसियानबीचको साझेदारी विश्वव्यापी स्थिरता र विकासका लागि एक शक्तिशाली आधारको रूपमा उदाइरहेको छ,’ मोदीले भने ।
भारत र आसियानले विश्वको जनसंख्याको लगभग एक चौथाइ प्रतिनिधित्व गर्ने स्मरण गर्दै मोदीले भने, ‘हामी केवल भूगोल मात्र साझा गर्दैनौं, हामी गहिरो ऐतिहासिक सम्बन्ध र साझा मूल्यहरूद्वारा पनि जोडिएका छौं । हामी ग्लोबल साउथका सहयात्री हौं । हाम्रो साझेदारी केवल व्यावसायिक मात्र होइन सांस्कृतिक पनि छ,’ मोदीले भने ।
