संयुक्त अरब इमिरेट्स (यूएई) मा जारी आईसीसी क्रिकेट विश्वकप लिग–२ शृंखलामा नेपालले लगातार तेस्रो हार भोगेको छ । नेपाली टोली शनिबार खेलिएको आफ्नो तेस्रो खेलमा अमेरिकासँग चार विकेटले पराजित भएको हो ।

जारी शृंखलामा नेपाल अझै जितविहीन छ । यो शृंखलामा नेपाली टोली अमेरिकासँग दोस्रो पटक पराजित भएको हो । यसअघि, पहिलो खेलमा पनि नेपाली टोली अमेरिकासँग एक सय ६ रनको फराकिलो अन्तरले हारेको थियो । अमेरिकाको भने जारी शृंखलामा यो लगातार तेस्रो जीत हो ।

यसका अतिरिक्त, नेपाली टोली आफ्नो दोस्रो खेलमा आयोजक यूएईसँग पनि पाँच विकेटले पराजित भएको थियो । लिग–२ तालिकाको पहिलो स्थानमा आसिन अमेरिकाले पछिल्लो जितसँगै आफ्नो अवस्थालाई थप मजबुत बनाएको छ ।

अमेरिकाले २३ खेलबाट ३४ अंक बटुलिसकेको छ । जारी सिजनको लिग–२ तालिकामा नेपालको अवस्था भने सन्तोषजनक छैन । १९ खेल खेलेको नेपाल १२ अंकसहित सातौं स्थानमा छ । नेपालले केवल पाँच जित र १२ हारको नतिजा निकालेको छ । नेपालको दुई खेल अनिर्णित रूपमा सकिएको छ ।​

दुबईस्थित आईसीसी एकेडेमी ग्राउन्डमा नेपालले टस हारी पहिले ब्याटिङको निम्तो पाएको नेपाली टोलीले ४९.५ ओभरमा सबै विकेट गुमाएर दुई सय ७१ रन बनाएको थियो । जवाफी ब्याटिङमा ओर्लिएको अमेरिकाले ४९ ओभरमा ६ विकेट गुमाएर दुई सय ७३ रन बनाउँदै विजय लक्ष्य पार गर्‍यो ।

अमेरिकी टोलीको जितमा साइतेजा मुकम्मला र मिलिन्द कुमारले उत्कृष्ट अर्धशतकीय योगदान गरे । साइतेजाले ७५ रन बनाए । मिलिन्दले पनि टोलीका लागि ७० रनको योगदान गरे । यी दुईले एक सय २३ रनको साझेदारी गरे ।

अमेरिकाका लागि सायान जहाँगिरले पनि ३६ रन बनाए । कप्तान मोनांक पटेलले टोलीको खातामा २१ रन थपे । हरमित सिंह १३ र सञ्जय कृष्णमुर्थी १५ रनमा अविजित रहे । अमेरिकाले अतिरिक्त रूपमा आठ रन पायो । 

नेपाली टोलीका बलर सन्दीप लामिछानेले तीन विकेट लिए । उनले १० ओभरमा ५३ रन खर्चिए । नन्दन यादव, करण केसी र गुलसन झाले पनि एक–एक विकेट हात पारे ।

टस हारी ब्याटिङको निम्तो पाएको नेपाली टोलीका लागि भने दीपेन्द्रसिंह ऐरीले उत्कृष्ट अर्धशतकीय पारी खेलेका थिए । उनले टोलीको खातामा ७५ रनको योगदान गरे । ओपनर ब्याट्सम्यान कुशल भुर्तेलले पनि टोलीका लागि ४७ रनको योगदान गरे ।

तेस्रो नम्बरमा क्रिज समाल्न आएका भीम सार्कीले पनि ४३ रन बनाए । कप्तान रोहित कुमार पौडेलले पनि टोलीको खातामा ३६ रन थपे । आठौं नम्बरमा क्रिज समाल्न आएका करण केसीले टोलीको खातामा ४९ रन थपे । सन्दीप लामिछाने चार रनमा अविजित रहे ।

अमेरिकी टोलीका बलर हरमित सिंहले तीन विकेट लिए । सौरभ नेत्रभाल्कर र नोस्थुश केन्जिगेले पनि दुई–दुई विकेट हात पारे । जसदीप सिंह र शुभम रन्जनले एक विकेट लिए । नेपालले अतिरिक्त रूपमा केवल ६ रन पाएको थियो ।

अमेरिकाको पहिलो विकेट गुलसन झाले लिएका थिए । उनले अमेरिकाका ओपनर ब्याट्सम्यान समित पटेललाई एलबीडब्लूको धरापमा पारे । विकेटकिपर ब्याट्सम्यान समित २७ बलमा एक छक्काको मद्दतले १६ रन बनाउँदै आउट भए । ११ औं ओभरको तेस्रो बलमा समित आउट हुँदा अमेरिकाले ५३ रन बनाएको थियो ।

अमेरिकाको दोस्रो विकेट अनुभवी लेग–स्पिनर सन्दीप लामिछानेले लिएका थिए । सन्दीपले क्रिजमा जमिसकेका अमेरिकाका ओपनर ब्याट्सम्यान सायान जहाँगिरलाई बोल्ड गरेका थिए । सायान ३६ रन बनाउँदै आउट भएका हुन् ।

प्रारम्भदेखि नै आक्रामक रुपमा प्रस्तुत भएका सायानले ४२ बलको सामना गरी एक छक्का र पाँच चौका पनि हिर्काएका थिए । १२ औं ओभरको पाँचौं बलमा सायान आउट हुँदा अमेरिकाले ५९ रन बनाएको थियो । 

अमेरिकाको तेस्रो विकेट नन्दन यादवले लिएका थिए । उनले अमेरिकी टोलीका कप्तान मोनांक पटेललाई पेभेलियन फर्काए । नन्दनले मोनांकलाई कुशल भुर्तेलमार्फत क्याच गराएका हुन् । तेस्रो नम्बरमा क्रिज समाल्न आएका मोनांकले २८ बलमा दुई चौकाको मद्दतले २१ रन बनाए । २१ औं ओभरको पाँचौँ बलमा मोनांक आउट हुँदा अमेरिकाले ९५ रन बनाएको छ ।

अमेरिकाको चौथो विकेट सन्दीप लामिछानेले लिए । उनले अमेरिकाका प्रभावशाली ब्याट्सम्यान मिलिन्द कुमारलाई भीम सार्कीद्वारा क्याच गराएका थिए । तर, त्यतिबेलासम्म अमेरिका जितको निकै नजिक पुगिसकेको थियो ।

पेभेलियन फर्किनुअघि मिलिन्द कुमारले टोलीको खातामा ७० रन थपेका थिए । उनले केवल ६६ बलको सामना गरी एक छक्का र सात चौका पनि हिर्काएका थिए । ४३ औं ओभरको पाँचौं बलमा मिलिन्द आउट हुँदा अमेरिकाले दुई सय १८ रन बनाइसकेको थियो ।

अमेरिकाको पाँचौं विकेट करण केसीले लिएका थिए । उनले अमेरिकाका प्रभावशाली ब्याट्सम्यान साइतेजा मुकम्मलालाई कुशल भुर्तेलमार्फत् क्याच गराए । लामो समय क्रिजमा टिकेका साइतेजाले टोलीका लागि ७५ रनको योगदान गरे ।

साइतेजाले जिम्मेवारीपूर्वक ब्याटिङ गर्दै एक सय एक बलमा एक छक्का र दुई चौका पनि हिर्काए । ४६ औं ओभरको दोस्रो बलमा साइतेजा आउट हुँदा अमेरिकाले दुई सय ३४ रन बनाइसकेको थियो । त्यतिबेला अमेरिकालाई जितका लागि केवल ३८ रन आवश्यक थियो ।

अमेरिकाको छैटौं विकेट सन्दीप लामिछानेले लिए । उनले शुभम रन्जनलाई विकेटकिपर आसिफ शेखद्वारा स्टम्पिङ गराएका थिए । पेभेलियन फर्किनुअघि शुभमले १२ बलमा एक छक्का र एक चौकाको मद्दतले १९ रन बनाएका थिए । ४८ औं ओभरको पाँचौं बलमा उनी आउट हुँदा अमेरिकाले दुई सय ५६ रन बनाएको थियो ।

त्यसअघि, नेपालले पहिलो विकेटका रूपमा ओपनर आसिफ शेखलाई गुमाएको थियो । विकेटकिपर ब्याट्सम्यान आसिफ दुई रन बनाउँदै आउट भए । उनी अमेरिकी बलर नोस्थुश केन्जिगेको बलमा बोल्ड भए । दोस्रो ओभरको दोस्रो बलमा आसिफ आउट हुँदा नेपालले केवल दुई रन बनाएको थियो ।

नेपालले दोस्रो विकेटका रुपमा ओपनर ब्याट्सम्यान कुशल भुर्तेललाई गुमाएको थियो । उनी केवल तीन रनका कारण एकदिवसीय अन्तर्राष्ट्रिय क्रिकेटमा आफ्नो १० औं अर्धशतक प्रहार गर्नबाट चुके । २८ वर्षीय कुशल ६५ बलमा दुई छक्का र दुई चौकाको मद्दतले ४७ रन बनाउँदै पेभेलियन फर्किए ।

कुशल भुर्तेल अमेरिकी बलर हरमित सिंहको बलमा बाउन्ड्री लाइननजिकै सौभर नेत्रभाल्करद्वारा समातिएका थिए । कुशल र भीम सार्कीले टोलीका लागि ८६ रनको साझेदारी गरे । २० औं ओभरको पहिलो बलमा उनी आउट हुँदा नेपालले एक विकेट गुमाएर ८८ रन बनाएको थियो ।

नेपालले तेस्रो विकेटका रुपमा भीम सार्कीलाई गुमाएको थियो । २४ वर्षीय भीम केवल सात रनका कारण एकदिवसीय अन्तर्राष्ट्रिय क्रिकेटमा आफ्नो पाँचौं अर्धशतक पूरा गर्नबाट चुके । तेस्रो नम्बरमा क्रिज समाल्न आएका भीम ५८ बलमा चार चौकाको मद्दतले ४३ रन बनाउँदै पेभेलियन फर्किए ।

भीमलाई अमेरिकी बलर हरमित सिंहले बोल्ड गरे । २२ औं ओभरको पाँचौं बलमा भीम आउट हुँदा नेपालले एक सय एक रन बनाएको थियो । उनले जिम्मेवारीपूर्वक खेल्दै ओपनर ब्याट्सम्यान कुशल भुर्तेलसँग ८६ रनको साझेदारी गरेका थिए ।

नेपालले चौथो विकेटका रूपमा आरिफ शेखलाई गुमाएको थियो । पाँचौं नम्बरमा क्रिज समाल्न आएका आरिफ आठ बलमा केवल दुई रन बनाउँदै आउट भएका हुन् । उनी पनि बाउन्ड्री प्रहार गर्ने धुनमा क्याच आउट भएका थिए ।

आरिफलाई सौरभ नेत्रभाल्करले नोस्थुश केन्जिगेद्वारा क्याच गराएका थिए । २५ औं ओभरको पहिलो बलमा आरिफ आउट हुँदा नेपालले एक सय ६ रन बनाएको थियो । लगातार विकेट पतनको क्रम शुरू भएपछि नेपाली ब्याट्सम्यान दबाबमा परेका थिए ।

नेपालले पाँचौं विकेटका रूपमा कप्तान रोहित पौडेललाई गुमाएको थियो । चौथो नम्बरमा क्रिज समाल्न आएका रोहित ३६ रन बनाउँदै आउट भए । २३ वर्षीय रोहितलाई अमेरिकी बलर हरमित सिंहले सायान जहाँगिरद्वारा क्याच गराएका हुन् ।

रोहितले ४६ बलको सामना गरी दुई चौका हिर्काए । उनी एकदिवसीय अन्तर्राष्ट्रिय क्रिकेटमा दुई हजार रन पूरा गर्नुअघि नै पेभेलियन फर्किए । थप दुई रन बनाएको भए रोहित एकदिवसीय अन्तर्राष्ट्रिय क्रिकेटमा दुई हजार रन पूरा गर्ने पहिलो नेपाली ब्याट्सम्यान बन्ने थिए । 

रोहित एकदिवसीय अन्तर्राष्ट्रिय क्रिकेटमा नेपालका लागि सर्वाधिक रन बनाउने ब्याट्सम्यान हुन् । उनी एकदिवसीय अन्तर्राष्ट्रिय क्रिकेटमा दुईवटा शतक प्रहार गर्ने एक मात्र नेपाली ब्याट्सम्यान पनि हुन् । उनले यूएईविरुद्धको खेलमा शतक बनाएका थिए । ३८ औं ओभरको चौथो बलमा रोहित आउट हुँदा नेपालले एक सय ९५ रन बनाएको थियो ।

नेपालले छैटौं विकेटका रुपमा गुलसन झालाई गुमाएको थियो । उनी ११ बलमा केवल पाँच रन बनाउँदै आउट भए । उनलाई जसदीप सिंहले शुभम रन्जनद्वारा क्याच गराएका हुन् । ४१ औं ओभरको अन्तिम बलमा गुलसन आउट हुँदा नेपालले दुई सय ६ रन बनाएको थियो ।

नेपालले सातौं विकेटका रूपमा उप–कप्तान दीपेन्द्रसिंह ऐरीलाई गुमाएको थियो । छैटौं नम्बरमा क्रिज समाल्न आएका अनुभवी अलराउन्डर दीपेन्द्र ७५ रनको महत्वपूर्ण पाली खेल्दै आउट भए । उनले केवल ६७ बलको सामना गरी तीन छक्का र दुई चौका हिर्काए ।

दीपेन्द्रलाई अमेरिकी बलर नोस्थुश केन्जिगे सञ्जय कृष्णमुर्थीद्वारा क्याच गराए । ४६ औं ओभरको तेस्रो बलमा दीपेन्द्र आउट हुँदा नेपालले दुई सय ३२ रन बनाएको थियो । त्यसअघि, दीपेन्द्रले केवल ४३ बलमा तीन छक्का र एक चौकाको मद्दतले आफ्नो अर्धशतक पूरा गरेका थिए । एकदिवसीय अन्तर्राष्ट्रिय क्रिकेटमा २५ वर्षीय दीपेन्द्रले पाँचौँ अर्धशतक बनाएका हुन् ।

नेपालले आठौं विकेटका रुपमा नन्दन यादवलाई गुमायो । उनी ६ बलमा एक रन बनाउँदै आउट भएका हुन् । उनलाई सौरभ नेत्रभाल्करले नोस्थुश केन्जिगेद्वारा क्याच गराए । ४८ औं ओभरको दोस्रो बलमा उनी आउट हुँदा नेपालले दुई सय ४४ रन बनाएको थियो ।

नेपालले नवौं विकेटका रूपमा करण केसीलाई गुमायो । आठौं नम्बरमा क्रिज समाल्न आएका करण ४९ रन बनाउँदै आउट भए । यसक्रममा करणले केवल ३१ बलको सामना गरी तीन छक्का र दुई चौका पनि हिर्काए ।

उनी शुभम रन्जनको बलमा जसदीप सिंहद्वारा समातिएका थिए । ४९ औं ओभरको अन्तिम बलमा उनी आउट हुँदा नेपालले दुई सय ६७ रन बनाएको थियो । ३४ वर्षीय करण केवल एक रनका कारण एकदिवसीय अन्तर्राष्ट्रिय क्रिकेटमा आफ्नो दोस्रो अर्धशतक पूरा गर्नबाट चुकेका थिए ।

नेपालले अन्तिम विकेटका रूपमा ललित राजवंशीलाई गुमाएको थियो । उनले एक रन बनाए । उनी अन्तिम ओभरको अन्तिम बलमा रन लिन दौडँदा रन आउट भएका थिए । यद्यपि, अन्तिम ओभरको अन्तिम बललाई अम्पायरले ‘वाइड’ घोषित गरेका थिए । तर, नेपालले १० विकेट गुमाइसकेको थियो ।

सहभागी टोलीका लागि आईसीसी क्रिकेट विश्व कप लिग–२ प्रतियोगिता निकै महत्त्वपूर्ण छ । यो प्रतियोगिता सन् २०२७ मा आयोजना हुने आईसीसी एकदिवसीय विश्वकपका लागि छनोटको आधारका रुपमा पनि रहेको छ ।

सन् २०२७ को एकदिवसीय विश्वकप दक्षिण अफ्रिका, जिम्बावे र नामिबियामा संयुक्त रुपमा आयोजना हुँदैछ । लिग–२ प्रतियोगिताको समाप्तिपछि अंक तालिकाको माथिल्लो चार स्थानमा रहने राष्ट्र सिधै उक्त एकदिवसीय विश्वकपको अन्तिम चरणको छनोटमा प्रवेश गर्नेछन् ।

लिग–२ तालिकाको अन्तिम चार स्थानमा रहने राष्ट्रले भने विश्वकप क्वालिफायरका लागि प्ले–अफ चरण खेल्नु पर्नेछ । यसका अतिरिक्त, अन्तर्राष्ट्रिय क्रिकेट काउन्सिल (आईसीसी)बाट सन् २०१८ मा प्राप्त एकदिवसीय मान्यता जोगाउन पनि यो प्रतियोगिताको महत्त्वपूर्ण भूमिका रहन्छ ।

हाल आईसीसीबाट अस्थायी रुपमा एकदिवसीय मान्यता पाएका नेपालसहितका एसोसिएट्स सदस्य राष्ट्रको उक्त मान्यता सन् २०२६ को विश्वकप छनोटसम्म कायम रहने छ । यो सूचीमा स्कटल्यान्ड, यूएई, नेदरल्यान्ड्स, नामिबिया, ओमान, अमेरिका र क्यानडा पनि रहेका छन् ।

यूएईमा जारी शृंखलामा नेपालले आफ्नो चौथो खेल नोभेम्बर ५ तारिख (कार्तिक १९ गते) आयोजक यूएईसँग खेल्नेछ । लिग–२ प्रतियोगिताको दोस्रो संस्करणमा सहभागी आठवटै राष्ट्रले ३६–३६ खेल खेल्नेछन् । प्रत्येक राष्ट्रले घरेलु मैदानमा तीनवटा शृंखला खेल्नेछन् भने ६ वटा शृंखला अन्य राष्ट्रको मैदानमा खेल्नेछन् ।