सरकारले प्रहरी ३३ औं महानिरीक्षक (आईजीपी)मा प्रहरी अतिरिक्त महानिरीक्षक (एआईजी) दानबहादुर कार्कीलाई नियुक्त गर्ने निर्णय गरेको छ ।

सोमबार सिंहदरबारमा बसेको मन्त्रिपरिषद् बैठकले कार्कीलाई आईजीपी नियुक्त गर्ने निर्णय गरेको हो । कार्कीले यही कात्तिक २७ गतेदेखि प्रहरीको नेतृत्व सम्हाल्नेछन् । 

चार जना एआईजीहरू क्रमशः कार्की, राजन अधिकारी, डा. मनोज केसी र सिद्धिविक्रम शाहमध्ये कार्की नै वरीयतामा अघि थिए ।

प्रधानमन्त्री सुशीला कार्की नेतृत्वको मन्त्रिपरिषद्‌मा गृहमन्त्री ओम प्रकाश अर्यालको प्रस्तावमा एआईजी कार्कीको नियुक्तिले प्रधानता पाएको हो ।

एआईजी केसीलाई आईजीपीमा नियुक्त गर्न प्रधानमन्त्री कार्की र गृहमन्त्री अर्याललाई आन्तरिकसँगै बाहिरी दबाब समेत थियो । तर, सरकारले एआईजी कार्कीलाई नै वरिष्ठताको आधारमा आईजी बनाउने निष्कर्ष निकालेको हो ।

सरकारले केन्द्रीय अनुसन्धान ब्यूरोलाई भ्रष्टाचारसँगै अन्य आपराधिक गतिविधिका फाइल खोल्न एआईजी डा. मनोज केसीमार्फत अघि बढेसँगै उनै केसीलाई आईजीपी बनाउने आकलन धेरैले गरेका थिए । तर, प्रधानमन्त्री कार्की र गृहमन्त्री अर्यालको सुझबुझपूर्ण निर्णयले एआईजी कार्कीको नियुक्तिले पूर्णता पाएको हो ।

प्रहरी नियमावलीमा अनुसार ३० वर्षे सेवा अवधिका कारण वर्तमान आईजीपी चन्द्रकुवेर खापुङ २६ कात्तिक राति १२ बजेबाट अनिवार्य अवकाशमा जाँदैछन् । खापुङ अवकाशमा गएसँगै कार्कीले कात्तिक २७ गतेबाट प्रहरी नेतृत्व सम्हाल्ने छन् ।

कार्की संगठनमा इमान्दार र समक्ष प्रहरीको रूपमा परिचित छन् । २०५४ चैत १८ गतेबाट प्रहरी निरीक्षकको रूपमा भर्ना भएका कार्की २०६६ मंसिर २६ गते डीएसपीमा बढुवा भएका थिए ।

डीएसपी रहँदा इलाका प्रहरी कार्यालय बुटवल हुँदै नयाँ बानेश्वर वृत्त, जिल्ला प्रहरी कार्यालय सप्तरीसम्म काम गरेका कार्कीसँग इन्टरपोल, मानव अधिकार इकाई, लागूऔषध नियन्त्रण ब्यूरो लगायत युनिटमा काम गरेको अनुभव छ । 

अख्तियार दुरुपयोग अनुसन्धान आयोगमा समेत रहेर काम गरेका कार्कीले जिल्ला प्रहरी कार्यालय कास्की, कपिलवस्तु, एसएसपी हुँदा काठमाडौं प्रहरी प्रमुख भएर काम गरेका थिए । 

डीआईजी भएपछि उनी प्रहरी महानिरीक्षकको सचिवालय हुँदै प्रदेश प्रहरी कार्यालय लुम्बिनीको प्रमुख भएर काम गरे । एआईजी भएपछि मानव स्रोत व्यवस्थापन विभाग र हाल काठमाडौं उपत्यका प्रहरी कार्यालयको प्रमुखको रूपमा कार्यरत छन् ।

विद्यमान प्रहरी नियमावलीमा भएको ३० वर्षे सेवा अवधिका कारण कार्कीले करिब साढे २ वर्ष प्रहरी संगठनको नेतृत्व गर्नेछन् । २०८४ चैत १७ गतेसम्म कार्कीले प्रहरीको नेतृत्व सम्हाल्नेछन् । 

प्रहरी प्रधान कार्यालयका अनुसार कार्कीले राजनीति शास्त्रमा स्नातकोत्तर गरेका छन् । पूर्वी टिमोरमा २ पटक र हाइटीमा १ पटक मिसन गएका छन् । 

काठमाडौं प्रहरीको प्रमुखको भूमिकामा रहँदा कार्कीले भुटानी शरणार्थी प्रकरणको मुद्दा अदालतसम्म पुर्‍याएका थिए ।

प्रहरी सेवामा रहँदाका बेला हालसम्म उनी कुनै ठूलो आर्थिक विवादमा मुछिएका छैनन् । एआईजी कार्कीसँग फिल्डदेखि अपराध अनुसन्धान कार्यमा समेत राम्रो अनुभव छ ।