२२ जेठ २०८३, शुक्रबार
गएको साता पुस २२ गते बिहान ११ बजे सिनामंगलबाट मित्रपार्क जाने क्रममा बस चढेका एक युवकको दुई लाख ७५ हजार रुपैयाँ चोरी भयो । बसमा यात्रु ठेलमठेल थिए ।
ती युवकको खल्तीबाट कुन बेला पकेटमारले पैसा झिके उनले थाहै पाएनन् ।
त्यसपछि उनी प्रहरी वृत्त गौशाला पुगेर उजुरी गरे । प्रहरीले पकेटमारको खोजी गरिरहेकै बेला पुस २३ मा एक महिलाको गलामा लगाएको सुनको सिक्री चोरी भयो ।
दुई दिनमै बसमा यात्रुको सुन र पैसा चोरी भएपछि गौशाला प्रहरी वृत्तले एउटा सूक्ष्म निगरानी टोली बनायो । बसमा यात्रुकै भेसमा प्रहरी खटायो । चार जनामध्ये दुईजना तिलगंगा र दुईजना सिनामंगलमा खटिए । शंकास्पद चारजना ‘लोकेट’ गरेपछि उनीहरूमाथि निगरानी बढाइयो ।
पकेटमारी गर्नै लाग्दा चार जनालाई सिनामंगलबाट पक्राउ गरियो । प्रहरीले दक्षिणकाली नगरपालिका २ बस्ने सरोज खड्का, काभ्रेपलाञ्चोकको महाभारत गाउँपालिका– ७ का विकास लामा, तनहुँको म्याग्दे गाउँपालिका– ५ का राजु गुरुङ र ललितपुर महानगरपालिका– ७ का सुवास मगर पक्राउ परे ।
खड्का, लामा, गुरुङ र मगरको दैनिकी नै कोटेश्वरदेखि चाबहिलसम्म चल्ने यात्रुवाहक बसमा पकेटमारी गर्ने र आएको पैसा बाँडेर लिने रहेको प्रहरीले जनाएको छ । संगठितरूपमा पकेटमारी गर्दै आएको यो गिरोहको विगत पनि आपराधिक नै देखिन्छ ।
खड्काविरुद्ध यसअघि पनि अभद्र व्यवहार, चोरी, डाँका र लागुऔषध समेत गरी विभिन्न प्रहरी युनिटमा ११ वटा मुद्दा चलेको प्रहरी अनुसन्धानबाट खुलेको छ ।
प्रहरीको अपराध अभिलेख प्रणाली (सीआरएस) मा हेर्दा खड्काको विगत आपराधिक पृष्ठभूमिको छ । पक्राउ परेकामध्ये गुरुङविरुद्ध अभद्र व्यवहार कसुरमा विभिन्न प्रहरी युनिटमा चारवटा, लामाविरुद्ध अभद्र व्यवहारमै दुईवटा र मगरविरुद्ध दुईवटा मुद्दा चलेको सीआरएसबाट खुलेको छ ।
जिल्ला प्रहरी परिसर काठमाडौंका प्रवक्ता एवं प्रहरी उपरीक्षक (एसपी) पवनकुमार भट्टराईका अनुसार यो समूहले पकेटमारीबाटै आफ्नो दैनिकी चलाउँदै आएको थियो ।
‘बाहिरबाट झट्ट हेर्दा यिनीहरू पकेटमार जस्ता देखिँदैनन्, तर भीडभाड भएका बसमा चढ्ने र पोकटमारीपछि गायब हुने गरेको देखियो,’ भट्टराईले लोकान्तरसँग भने, ‘यिनीहरूले जोडेको सम्पत्ति पनि हामी खोज्दैछौं ।’
सरोज खड्काको पृष्ठभूमि
काठमाडौं दक्षिणकालीका ३७ वर्षीय खड्का २६ वर्षकै उमेरमा लागुऔषधसहित पक्राउ परेका थिए ।
उनलाई कोटेश्वरस्थित लागूऔषध नियन्त्रण ब्यूरोले २०७१ पुस २० गते पक्राउ गरेर मुद्दा चलाएको थियो । उनी केही महिना जेल परेर छुटे । २०७४ जेठ ५ मा ललितपुरका रामबहादुर स्याङ्तानले खड्काविरुद्ध अभद्र व्यवहारमा जिल्ला प्रहरी परिसर ललितपुरमा जाहेरी दिए । खड्का पक्राउ परे ।
धरौटीमा छुटेका उनको अपराध कर्म छुटेन । २०७६ मा खड्काविरुद्ध तीन फरक प्रहरी युनिटले अभद्र व्यवहारमै मुद्दा चलायो । प्रहरी वृत्त कालीमाटीले भदौ २० मा, बानेश्वर वृत्तले माघ ६ मा र कालिमाटी वृत्तले फागुन २३ मा अभद्र व्यवहारमै मुद्दा चलाएका थिए ।
पक्राउ पर्दै धरौटीमा छुट्दै आएका खड्कालाई आपराधिक गतिविधिमा संलग्न हुने बानी लागिसकेको थियो । २०७७ भदौ २८ मा भने खड्काविरुद्ध चोरी तथा डाँका मुद्दा पर्यो ।
प्रहरी वृत्त स्वयम्भूले पक्राउ गरेका उनी जेल गए । जेलमा करिब साढे दुई वर्ष बसेर छुटेका खड्का २०८० माघ ५ गते पुन: पक्राउ परे । प्रहरी वृत्त महाराजगञ्जले उनीविरुद्ध अभद्र व्यवहारमा मुद्दा चलायो ।
प्रहरी प्रतिवेदनमार्फत मुद्दा चलाइएका खड्का धरौटीमा छुटेको ६ महिनामै (२०८१ साउन २१) मा पुन: पक्राउ परे । चोरी तथा डाँका कसुरमा पक्राउ परेका खड्काविरुद्ध महाराजगञ्ज वृत्तबाटै मुद्दा चल्यो । धरौटीमा छुटे ।
खड्काले अपराध गर्न छाडेनन् । प्रहरीमा उनीविरुद्ध जाहेरी पर्दै गयो । यही वर्ष २०८२ जेठ २२ मा पीडित तारा तामाङले प्रहरी वृत्त महाराजगञ्जमै जाहेरी हालिन् । प्रहरीले पक्राउ गर्यो । खड्का हिरासतमा २२ दिन बसेर धरौटीमा छुटे ।
साउन २७ मा प्रहरी वृत्त कालिमाटीमा खड्काविरुद्ध अर्को जाहेरी पर्यो, अभद्र व्यवहार कसुरमै । बानेश्वरले मुद्दा चलायो । उनी धरौटीमा छुटेर पकेटमारीमा संलग्न भए । यही पुस २३ गते दिउँसो साढे १ बजे खड्का पक्राउ परे । उनीविरुद्ध सिक्री लुटपाट र पकेटमारी कसुरमा प्रहरीले अनुसन्धान अघि बढाएको छ ।
२०८१ मै चारपटक पक्राउ पर्दा नखुलेको गुरुङको चेत
खड्कासँगै पक्राउ परेका तनहुँ म्याग्देका राजु गुरुङ काठमाडौंको टोखामा बस्दै आएका थिए । दिनभरी रिङरोडमा चल्ने बसमा चहार्ने र पकेट मार्ने दैनिकी उनको थियो ।
३३ वर्षका गुरुङ प्रहरीको सीआरएस रेकर्डअनुसार पहिलोपटक २०८१ वैशाख ३ गते पक्राउ परेका थिए । प्रहरी प्रतिवेदनकै आधारमा प्रहरी वृत्त महाराजगञ्जले गुरुङविरुद्ध अभद्र व्यवहारमा मुद्दा चलाएको थियो ।
२०८१ मै उनी योसहित चारपटक पक्राउ परेका थिए । त्यो पनि महाराजगञ्ज वृत्तबाटै मुद्दा चल्यो । २०८१ मंसिर २३ र चैत २ मा उनीविरुद्ध अभद्र व्यवहारमा मुद्दा चलेको थियो । उनी धरौटीमा छुटेका थिए ।
दुई वर्षपछि फेरि अपराधमा फर्किएका लामा काभ्रेपलाञ्चोकको महाभारत गाउँपालिका– ७ घर भएर काठमाडौं काँडाघारीमा बस्दै आएका ४२ वर्षीय विकास लामाको घर–परिवारको जोहो पनि पकेटमारी र चोरीमै चल्दै आएको थियो ।
उनी पहिलोपटक २०८० भदौ २७ मा पक्राउ परेका थिए । प्रहरी वृत्त महाराजगञ्जले उनलाई अभद्र व्यवहारमा मुद्दा चलाएको थियो । धरौटीमा छुटेका लामा पुन: पक्राउ परे, मंसिर २०८० मंसिर २० मा । प्रहरी वृत्त गौशालाले पक्राउ गरेका लामाविरुद्ध अभद्र व्यवहारमा मुद्दा चल्यो । उनी धरौटीमा छुटे ।
पछिल्लोपटक लामा गत पुस २३ गते पकेटमारी र सिक्री चोरीको आरोपमा पक्राउ परेका हुन् ।
काभ्रेबाट काठमाडौं सरेका मगर
ललितपुर महानगरपालिका– ७ मा बस्दै आएका ३३ वर्षीय सुवास मगरको आपराधिक पृष्ठभूमि खोतल्दा उनीविरुद्ध पहिलोपटक जिल्ला प्रहरी कार्यालय काभ्रेबाट अभद्र व्यवहारमा मुद्दा चलेको देखिन्छ ।
स्थानीय वेदप्रकाश गौतमको जाहेरीले २०७१ फागुन २७ मा अभद्र व्यवहारमा मुद्दा चलेका मगर धरौटी बुझाएर छुटेका थिए । त्यसपछि उनी एकैपटक ११ वर्षपछि २०८२ साउन २७ मा पक्राउ परे ।
प्रकाश सुवेदीको जाहेरी अनुसार मगरविरुद्ध प्रहरी वृत्त बानेश्वरले अभद्र व्यवहारमै मुद्दा चलाएको थियो । उनी धरौटीमा छुटे । हाल खड्का, लामा र गुरुङसँगै उनी पकेटमारी र सिक्री चोरीमा पुस २३ गते तीलगंगाबाट पक्राउ परेका छन् ।
