अमेरिकी राष्ट्रपति डोनाल्ड ट्रम्पले ग्रिनल्याण्डमा बल प्रयोग नगर्ने घोषणा गरेका छन्। बुधबार स्वीट्जरल्याण्डको डाभोसमा आयोजित विश्व आर्थिक मञ्च (वर्ल्ड इकोनोमिक फोरम)मा सम्बोधन गर्दै राष्ट्रपति ट्रम्पले ग्रिनल्याण्डलाई अमेरिकी अधीनमा ल्याउन बल प्रयोग नगर्ने बताएका हुन्। 'ग्रिनल्याण्ड लिन हामी बल प्रयोग गर्दैनौं। तर तपाईंहरूले अस्वीकार गरे अरू विकल्पबाट ग्रिनल्याण्ड अमेरिकाले लिन्छ,' उनले युरोपेली नेताहरू सहभागी भएको कार्यक्रम भने। 

ट्रम्पले ग्रिनल्याण्डको सुरक्षाका लागि अमेरिका मात्रै सक्षम भएको पनि उनले बताए। विश्वयुद्धमा जर्मनीका अघि ६ घन्टामै ढलेको डेनमार्कले आफू र ग्रिनल्याण्ड दुवैलाई सुरक्षित राख्न नसक्ने उनको भनाइ थियो । 

युरोपले संयुक्त राज्य अमेरिकाबाट फाइदा उठाएकोमा ट्रम्पले निरन्तर गुनासो गरे। उनले अनियन्त्रित आप्रवासन र कट्टरपन्थी आर्थिक नीतिहरूको रूपमा प्रस्तुत गरेको कुरामार्फत् आफ्नो महादेशलाई अपरिचित बनाएकोमा युरोपेली नेताहरूको आलोचना गरे।

तैपनि, आफ्ना युरोपेली समकक्षीहरूप्रति गुनासो र अपमानले भरिएको डाभोसमा उनको भाषणले छाप छोड्यो । आफ्नो भाषणको शुरूमा ट्रम्पले युरोप सही दिशामा नगएको बताए। उनले बढ्दो सरकारी खर्च, अनियन्त्रित सामूहिक बसाइँसराइ र अनन्त विदेशी आयातलाई दोष दिए।

ट्रम्पले डेनमार्कबाट ग्रीनल्याण्ड प्राप्त गर्न तत्काल वार्ता चाहेको बताए। ट्रम्पले ग्रिनल्याण्डको नियन्त्रण लिनाले नेटोलाई हानि पुर्‍याउने दाबीलाई अस्वीकार गरे । 

ट्रम्पले संयुक्त राज्य अमेरिकाले आफ्नो राष्ट्रपतित्वको समयमा आर्थिक चमत्कार अनुभव गरिरहेको बताए । 

ट्रम्पले युक्रेन युद्ध रोक्न वार्ता गरिरहेको बताए । 'म राष्ट्रपति पुटिनसँग कुरा गरिरहेको छु र मलाई विश्वास छ कि उहाँ सम्झौता चाहनुहुन्छ। म राष्ट्रपति जेलेन्स्कीसँग पनि कुरा गरिरहेको छु र मलाई विश्वास छ कि उहाँ पनि सम्झौता चाहनुहुन्छ।'

चीनले ठूलो संख्यामा विन्ड टर्बाइनहरू उत्पादन गरे पनि आफूले चीनमा कतै पनि विन्ड फार्महरू फेला पार्न नसबेको उनले बताए । 

ट्रम्पले फ्रान्स र क्यानडाजस्ता देशहरूको पनि आलोचना गरे। उनले सोमालियाका जनताका लागि अपमानजनक शब्दहरू प्रयोग गरे। भाषणपछि ट्रम्पले भारतीय प्रधानमन्त्री मोदीको प्रशंसा गरे र उनलाई आफ्नो साथी भने । ट्रम्पले भारत र अमेरिकाबीच चाँडै नै राम्रो व्यापार सम्झौतामा हस्ताक्षर हुने पनि बताए।

अमेरिकी कारबाहीपछि भेनेजुएला भविष्यमा धेरै फाइदा लिन तयार रहेको उनले बताए । अमेरिका र भेनेजुएलाले ५ करोड ब्यारेल तेलको लागि सम्झौता गरेका छन्। अमेरिकाले आफ्ना प्रमुख तेल कम्पनीहरूलाई भेनेजुएलामा ल्याउनेछ। दुवै देशले तेलको राजस्व बाँड्नेछन्।