३२ असार २०८३, बिहीबार
छैटौं टाइगर कप भलिबल च्याम्पियनसिपको पुरुषतर्फको उपाधि गण्डकी प्रदेश भलिबल संघले जितेको छ ।
गण्डकी प्रदेश भलिबल संघले शनिबार पोखरा रंगशालास्थित भलिबल कोर्टमा खेलिएको फाइनल खेलमा विभागीय टोली नेपाल पुलिस क्लबलाई ३–१ सेटले हराउँदै उपाधि चुमेको हो ।
यसअघि, प्रतियोगिताको आयोजकले फाइनल खेल गण्डकी प्रदेश भलिबल संघ र पर्वत जिल्ला भलिबल संघबीच हुने जानकारी दिएको थियो ।
तर, पछि आयोजकले प्रेस विज्ञप्ति जारी गर्दै प्राविधिक त्रुटिका कारण पहिले गण्डकी र पर्वतको नाम सार्वजनिक भएको दाबीसहित त्यसलाई सच्याएर गण्डकी र पुलिसबीच फाइनल खेलाइने जानकारी गराएको थियो ।
फाइनल खेलको पहिलो सेटमा पुलिसले गण्डकीलाई २५–२३ अंकले पछि पारेको थियो । त्यसपछि गण्डकीले खेलमा उत्कृष्ट पुनरागमन गरेको थियो ।
गण्डकीले दोस्रो सेटको नतिजालाई २८–२६ अंकले आफ्नो पक्षमा पार्यो । तेस्रो सेटमा पनि गण्डकी प्रदेशको टोली २५–२२ अंकले अगाडि रह्यो ।
त्यसपछि, गण्डकी प्रदेशले चौथो सेटको नतिजालाई पनि २५–१७ अंकले आफ्नो पक्षमा पार्यो । प्रतियोगितामा पर्वत तेस्रो भयो ।
तेस्रो स्थानका लागि शनिबार नै खेलाइएको खेलमा पर्वत जिल्ला भलिबल संघले अर्को विभागीय टोली त्रिभुवन आर्मी क्लबलाई ३–० को सोझो सेटमा हरायो ।
पहिलो हुने टोली गण्डकीले ट्रफीसहित ६ लाख ६६ हजार ६ सय ६६ रुपैयाँ नगद पुरस्कार पनि पायो । उप–विजेता टोलीले तीन लाख ६६ हजार ६ सय ६६ रुपैयाँ पुरस्कार हात पार्यो ।
प्रतियोगितामा तेस्रो भएको पर्वत जिल्ला भलिबल संघको टोलीले भने दुई लाख ६६ हजार ६ सय ६६ रुपैयाँ नगद पुरस्कार पायो ।
यसअघि, शुक्रबार महिलातर्फको उपाधि टिपटप न्यू डायमन्ड युथ स्पोर्टस क्लबले जितेको थियो । फाइनल खेलमा न्यु डायमन्डले नेपाल पुलिस क्लबलाई ३–० को सोझो सेटमा हराएको थियो ।
