पैदलयात्रीलाई सडकमै मुक्का हान्ने कार चालकको प्रहरीले खोज्न शुरू गरेको छ । एक कार चालकले पैदलयात्रीलाई कुटेको भिडियो सामाजिक सञ्जालमा भाइरल बनेपछि प्रहरीले खोजी शुरू गरेको जिल्ला प्रहरी परिसर काठमाडौंका एसपी पवनकुमार भट्टराईले बताए । 

भिडियो कहाँको हो भन्ने खुलि नसकेको उनको भनाइ छ । 'त्यो भिडियो हामीलाई पनि प्राप्त भएको छ । कहाँको हो भन्ने खुलिसकेको छैन । जहाँको भए पनि अनुसन्धान शुरू गरिसकेका छौं । अवश्य पत्ता लाग्ने छ । पत्ता लगाएर कारबाहीको दायरामा ल्याउँछौं,' लोकान्तरसँग उनले भने । 

सामाजिक सञ्जालमा भाइरल भिडियोमा कारबाट झरेका व्यक्तिले गाली गर्दै पिटेको देखिन्छ । त्यसपछि अर्को एक महिला आएर पनि गाली गरेको भिडियोमा सुनिन्छ ।

त्यसपछि कार चालकले फेरि ती पैदलयात्रीलाई कुटेका छन् । उक्त भिडियो सार्वजनिक भएपछि सर्वसाधारणले आक्रोश व्यक्त गरिरहेका छन् ।