प्रतिनिधिसभा सदस्य निर्वाचनमा भोलि बिहीबार हुने मतदानका लागि कोशी प्रदेशमा  ३५ लाख ७४ हजार ३१० जना मतदाता कायम भएका छन् । कोशीमा प्रत्यक्षतर्फ २८ सीटका लागि मतदान हुनेछ ।

प्रदेश निर्वाचन कार्यालयका अनुसार प्रदेशभर ४ हजार २७० मतदान केन्द्र तोकिएका छन् । यसपटक कोशी प्रदेशबाट प्रतिनिधिसभाका लागि ४९५ जना उम्मेदवार चुनावी मैदानमा छन् ।

प्रदेश निर्वाचन अधिकारी चोलाराज दंगालले मतदान केन्द्र निर्माणदेखि सुरक्षाकर्मी परिचालनसम्मका सबै प्राविधिक र व्यवस्थापकीय काम सम्पन्न भइसकेको जानकारी दिए । 

दंगालले निर्वाचनलाई लोकतन्त्रको उत्सवका रूपमा लिँदै निर्धक्क भई मतदान गर्न सबै मतदातालाई अपिल समेत गरेका छन् । 

निर्वाचनलाई भयरहित र शान्तिपूर्ण बनाउन कोशी प्रदेशमा विशेष सुरक्षा रणनीति अपनाइएको छ । प्रदेशभर १२ हजार नेपाल प्रहरी र २३ हजार निर्वाचन प्रहरी गरी कूल ३५ हजार सुरक्षाकर्मी प्रत्यक्ष रूपमा खटिएका छन् । 

कूल १ हजार ९०७ मतदानस्थलमध्ये सुरक्षा संवेदनशीलताका आधारमा ४३९ स्थललाई ‘अति संवेदनशील’ र ८२१ लाई ‘संवेदनशील’ सूचीमा राखेर सुरक्षा व्यवस्था कडा पारिएको छ । 

विशेष गरी झापा क्षेत्र नम्बर ५ लाई ‘हाइ प्रोफाइल’ संवेदनशीलताको सूचीमा राख्दै थप १०० जनाको विशेष सुरक्षा टोली परिचालन गरिएको छ ।

कोशी प्रदेश प्रहरी प्रमुख डीआईजी विनोद घिमिरेले सुरक्षा स्थिति पूर्ण नियन्त्रणमा रहेको दाबी गरेका छन् । सम्भावित जोखिमको सूक्ष्म विश्लेषण गरी सुरक्षा घेरा मजबुत बनाइएकाले मतदाताले ढुक्क भएर मतदान गर्ने वातावरण सुनिश्चित गरिएको उनले बताए । 

यसपटकको निर्वाचनमा भौतिक मुठभेडभन्दा पनि सामाजिक सञ्जालमार्फत् फैलाइने अफवाहलाई प्रहरीले मुख्य चुनौतीका रूपमा लिएको छ । डीआईजी घिमिरेका अनुसार प्रदेशस्तरमै ‘साइबर डेस्क’ स्थापना गरेर डिजिटल गतिविधिमाथि सूक्ष्म निगरानी भइरहेको छ ।

नेपाली सेना, सशस्त्र प्रहरी र राष्ट्रिय अनुसन्धान विभागसँगको समन्वयमा सुरक्षा व्यवस्था मिलाइएको छ ।

संखुवासभा, सोलुखुम्बु र ताप्लेजुङ जस्ता हिमाली जिल्लामा प्राकृतिक र भौगोलिक चुनौतीलाई सम्बोधन गर्न स्याटेलाइट फोनको व्यवस्था गरिएको छ भने दुर्गम क्षेत्रमा मतपेटिका ढुवानीका लागि आवश्यकता अनुसार हेलिकप्टर समेत प्रयोग गरिने तयारी छ ।

यस्तै, कोशी प्रदेशको भारत र चीनसँग जोडिएका सीमा नाकामा पनि निगरानी बढाइएको छ । झापा, सुनसरी र मोरङमा भारतीय सुरक्षा निकायसँग ‘काउन्टर–पार्ट’ बैठक सम्पन्न गरी सीमा क्षेत्रको सुरक्षा मजबुत बनाइएको प्रदेश प्रहरी कार्यालयले जनाएको छ ।