मदिरा घोटाला प्रकरणमा केन्द्रीय अनुसन्धान ब्यूरोको अपिल अर्को बेन्चमा सार्न अस्वीकार भएपछि आम आदमी पार्टीका संयोजक अरविन्द केजरीवाल सर्वोच्च अदालत पुगेका छन् ।

यसअघि दिल्ली उच्च अदालतले न्यायाधीश स्वराणा कान्ता शर्माको एकल बेन्चबाट मुद्दा सार्न केजरीवालले गरेको माग अस्वीकार गरेको थियो । 

त्यसपछि उनले उक्त निर्णयविरुद्ध सर्वोच्च अदालतमा निवेदन दिएका द इन्डियन एक्सप्रेसले जनाएको छ । साथै उच्च अदालतले मार्च ९ मा गरेको टिप्पणीविरुद्ध पनि उनले अपिल दर्ता गरेको जनाइएको छ ।

दिल्ली उच्च अदालतका मुख्य न्यायाधीश डी.के. उपाध्यायले कथित मदिरा घोटाला प्रकरणमा केन्द्रीय अनुसन्धान ब्यूरोले दायर गरेको पुनरवलोकन निवेदन न्यायाधीश शर्माको बेन्चबाट हटाएर अर्को बेन्चमा पठाउनुपर्ने माग अस्वीकार गरेका थिए । 

मार्च १३ मा उच्च अदालतका रजिस्ट्रार जनरल कार्यालयबाट जारी सूचनामा उक्त निवेदन सार्नुपर्ने कुनै कारण नदेखिएको उल्लेख गरिएको छ ।

मुख्य न्यायाधीश उपाध्यायले निवेदन हालको कार्यसूचीअनुसार सम्बन्धित न्यायाधीशलाई तोकिएको र मुद्दाबाट अलग हुने वा नहुने निर्णय सम्बन्धित न्यायाधीशकै अधिकार क्षेत्रभित्र पर्ने बताएका छन् । प्रशासनिक रूपमा निवेदन सार्नुपर्ने आवश्यकता नदेखिएको पनि उनले जनाएका छन् ।

यसअघि मार्च ११ मा केजरीवाल र आम आदमी पार्टीका अन्य नेताहरूले मुख्य न्यायाधीशलाई पत्र लेख्दै न्यायाधीश शर्माको बेन्चमा निष्पक्ष र तटस्थ सुनुवाइ नहुन सक्ने गम्भीर आशंका रहेको भन्दै मुद्दा अर्को बेन्चमा सार्न माग गरेका थिए ।

फेब्रुअरी २७ मा दिल्ली अदालतले केन्द्रीय अनुसन्धान ब्यूरोको मुद्दामा केजरीवाल र मनीष सिसोदियासहित सबै २३ जना अभियुक्तलाई उन्मुक्ति दिएको थियो । त्यसपछि केन्द्रीय अनुसन्धान ब्यूरोले उक्त निर्णयविरुद्ध उच्च अदालतमा अपिल गरेको थियो ।

उच्च अदालतले मार्च ९ मा दिल्ली अदालतले अनुसन्धान अधिकृतविरुद्ध विभागीय कारबाही गर्न गरेको सिफारिससम्बन्धी टिप्पणीलाई स्थगित गरेको थियो । अभियुक्त पक्षका तर्फबाट कोही उपस्थित नभएकाले उक्त आदेश एकतर्फी रूपमा जारी भएको थियो ।

न्यायाधीश शर्माले ट्रायल अदालतको निर्णयमा केही तथ्यगत असंगतता देखिएकाले स्थगन आवश्यक भएको उल्लेख गरेकी थिइन् । साथै साक्षी तथा सरकारी साक्षीका बयानबारे ट्रायल अदालतले आरोप निर्धारणकै चरणमा गरेका केही टिप्पणीहरू प्रारम्भिक रूपमा त्रुटिपूर्ण देखिएको उच्च अदालतको ठहर छ ।

यसैबीच, सोही मुद्दामा आधारित अर्को अनुसन्धानसँग सम्बन्धित अदालतको प्रक्रिया पनि हालका लागि स्थगित गर्न आग्रह गरिएको छ । यस मुद्दामा अब सोमबार न्यायाधीश शर्माको बेन्चमा सुनुवाइ हुने अपेक्षा गरिएको छ ।