नेकपा एमालेका अध्यक्ष केपी शर्मा ओलीले महाभारतको प्रसंग सुनाउँदै पार्टीका सांसदहरूको हौसला बढाउने प्रयास गरेका छन् ।

कुरुक्षेत्रको युद्धमा कौरवको सेना ठूलो भए पनि पराजित भएको प्रसंग सुनाउँदै ओलीले आफूहरू थोरै भए पनि सत्यले जित्ने बताए ।

'महाभारतको युद्धमा कौरवको सेना निकै ठूलो थियो । सञ्जयले धृतराष्ट्रलाई भने– भीष्मद्वारा हाँकिएको त्यो हाम्रो सेना विशाल छ । तर, पाण्डवको सेना थोरै छ, जसको नायक भीम छ,' सञ्जय-धृतराष्ट्र संवादको प्रसंग उल्लेख गर्दै बिहीबार च्यासलमा ओलीले भने, 'कौरवको सेना ठूलो र पाण्डवको सेना सानो थियो, तर नतिजा सत्यको पक्षमा आयो । सत्यको पक्षमा आउँछ ।'

२१ फागुनमा सम्पन्न प्रतिनिधि सभा निर्वाचनमा एमाले तेस्रो दलका रूपमा खुम्चिएको थियो । प्रतिनिधिसभामा एमालेका जम्मा २५ सांसद छन् । पहिलो दल राष्ट्रिय स्वतन्त्र पार्टीका १८२ सांसद छन् ।

शपथपछि एमाले सांसदलाई च्यासलस्थित केन्द्रीय आयोगमा बोलाएर ओलीले सम्बोधन गरेका हुन् ।