भगवान् शिवको पावन धाम पशुपतिनाथ, जहाँ युगौँदेखि बागमती नदीको जलले भगवानको नित्य अभिषेक हुँदै आएको छ ।

तर, समयसँगै बागमतीको पानीमा मिसिएको प्रदूषणले हरेक भक्तजनको मनमा एउटा गहिरो चिन्ता र अमिलोपन छाड्दै आएको थियो । मन्दिरमा पूजाका लागि अहिले पनि एउटा पुरानो कुवाकै भर पर्नुपर्ने बाध्यात्मक अवस्था छ ।

तर, अब यो अवस्था सदाका लागि अन्त्य हुँदैछ ।

बागमती नदीको उद्गम विन्दु ‘बागद्वार’को शीतल र कञ्चन जल अब ‘डेडिकेटेड’ पाइपलाइनमार्फत सिधै पशुपतिनाथको प्राङ्गणमा अवतरण गराउने बृहत् गृहकार्य शुरू भएको छ ।

यो केवल एउटा भौतिक पूर्वाधार होइन, यो त आस्था र प्रविधिको एक अनुपम संगम हो ।

१७ किलोमिटरको यात्रा: कुवा र फोहोर पानीबाट मुक्ति

कल्पना गर्नुस् त, शिवपुरी पर्वतको काखमा रहेको बागद्वारबाट निस्किएको हिउँजस्तै चिसो र शुद्ध पानी सिधै पशुपतिनाथको गर्भ गृहमा पुग्दा कस्तो होला ?

हो, यही सपनालाई बिपना बनाउन करिब १७ किलोमिटर लामो चुहावटमुक्त र चुस्त डेडिकेटेड पाइपलाइन बिछ्याइँदै छ । यो पाइपलाइन सुन्दरीजल हुँदै बागमती नदीको किनारैकिनार पशुपतिनाथ मन्दिरसम्म आइपुग्नेछ ।

यसले मन्दिरमा भगवान् शिवको नित्य जल अभिषेकका लागि कुवाको पानी कुर्नुपर्ने बाध्यात्मक अवस्थाको अन्त्य गरिदिनेछ । बागद्वारको शुद्ध जलले मन्दिर प्राङ्गणमा नयाँ ऊर्जा र सात्विक शुद्धताको सञ्चार गर्नेछ ।

जल अभिषेक मात्र होइन,भक्तजनलाई पवित्र ‘प्रसाद’

यो कञ्चन जल केवल मन्दिरको अभिषेकमा मात्र सीमित रहने छैन ।

भारतको बनारसस्थित विश्वनाथ मन्दिरले आफ्नो जल व्यवस्थापनमा गरेको सफल अभ्यासलाई पछ्याउँदै नेपालले पनि धार्मिक पर्यटनमा एउटा ठूलो फड्को मार्ने तयारी गरेको छ ।

बागद्वारबाट ल्याइएको पानीलाई अत्याधुनिक प्रविधिबाट प्रशोधन गरी पवित्र 'प्रसाद' का रूपमा भक्तजनहरूलाई उपलब्ध गराउने विस्तृत योजना बनाइएको छ ।

अब पशुपतिनाथको दर्शन गर्न आउने स्वदेशी तथा विदेशी पर्यटकहरूले बागद्वारको पवित्र जल बोतलमा उपहारस्वरूप लिएर जान पाउनेछन् ।

यसले तीर्थयात्रीहरूको बसाइलाई थप आध्यात्मिक बनाउनुका साथै स्थानीय अर्थतन्त्रलाई समेत चलायमान बनाउने विश्वास लिइएको छ ।

कहाँ पुग्यो काम?के थिए बाधाहरू?

यति भव्य योजनाको चर्चा भइरहँदा प्रश्न उठ्छ— काम कहाँ पुग्यो त ?

गोकर्णेश्वर नगरपालिकाका मेयर दीपक कुमार रिसालका अनुसार, स्थानीय तहदेखि प्रदेश सरकारसम्मले यस परियोजनाका लागि बजेट विनियोजन गरिसकेका छन् ।

तर, पाइपलाइन बिछ्याउने बाटो शिवपुरी राष्ट्रिय निकुञ्ज क्षेत्रभित्र पर्ने भएकाले केही प्रक्रियागत र कानूनी जटिलताहरू उत्पन्न भएका छन्, जसले गर्दा काममा ढिलाइ हुन पुगेको छ ।

तर, अहिले समस्या समाधानको दिशामा छ । मेयर रिसालले दिएको जानकारी अनुसार, हाल पशुपति क्षेत्र विकास कोष र पर्यटन विभागसँग आवश्यक समन्वय र गहन छलफल भइरहेको छ ।

सबै कानूनी प्रक्रिया समयमै पूरा गरी यही आर्थिक वर्षभित्रै काम शुरू गर्न गोकर्णेश्वर नगरपालिका पूर्ण रूपमा तत्पर रहेको मेयर रिसालले स्पष्ट पारेका छन् ।

५ देखि ६ करोडको लगानी र आध्यात्मिक पुनर्जागरण

यो परियोजनाको प्रभाव मन्दिरभित्र मात्र सीमित रहने छैन । सुन्दरीजलदेखि बागद्वारसम्मको ५ किलोमिटर उकालो बाटोलाई भक्तजन र पर्यटकहरूका लागि सहज, सुरक्षित र आकर्षक पदमार्गका रूपमा विकास गरिँदै छ ।

यसले पशुपति दर्शन गर्न आउने पर्यटकहरूलाई एउटा नयाँ आध्यात्मिक गन्तव्यको अनुभव प्रदान गर्नेछ । करिब ५ देखि ६ करोड रुपैयाँको लगानीमा निर्माण हुन लागेको यो परियोजना केवल पाइप बिछ्याउने प्राविधिक काम मात्र होइन, यो पशुपतिनाथको गौरव पुनर्स्थापित गर्ने एउटा पवित्र यज्ञ हो ।

यस बृहत् योजनालाई राष्ट्रिय गौरवको परियोजनाकै तहमा पुर्‍याउन संस्कृति, पर्यटन तथा नागरिक उड्डयन मन्त्रालय, खानेपानी मन्त्रालय, पशुपति क्षेत्र विकास कोष र स्थानीय तहहरू— विशेष गरी गोकर्णेश्वर, बूढानीलकण्ठ र कागेश्वरी मनोहरा नगरपालिकाले उच्च समन्वय र अपनत्व देखाएका छन् । आगामी साउन महिनाबाट यो योजनाले मूर्त रूप लिने अपेक्षा गरिएको छ ।

आधुनिकता र प्रदूषणको भीडमा पशुपतिनाथको स्नान र अभिषेकमा जुन असीम शान्ति र आनन्द कहीँ कतै हराएको थियो, त्यो अब पुनः जागृत हुने पक्का छ ।

अब पशुपतिनाथमा बग्ने जलमा मात्र होइन, यहाँको सम्पूर्ण वातावरणमै एक प्रकारको सात्विक शुद्धि र दैवी आभा देखिन थाल्नेछ, जसले हरेक भक्तजनलाई पटकपटक यो पावन भूमिमा तानिरहनेछ ।

हेर्नुहोस्, भिडियो: