खाजाघरमा काम दिने प्रलोभन देखाएर महिलालाई जबर्जस्ती वेश्यावृत्तिमा लगाएको आरोपमा प्रहरीले दुई जनालाई पक्राउ गरेको छ ।

मानव बेचबिखन अनुसन्धान ब्यूरोका अनुसार पीडितलाई भाडा माझ्ने र सरसफाइको काममा लगाउने भन्दै शुरूमा मासिक ७ हजार र पछि १५ हजार रूपैयाँसम्म तलब दिने प्रलोभन देखाइएको थियो ।

पक्राउ पर्नेमा सिन्धुपाल्चोकको इन्द्रावती गाउँपालिका–९ की ३७ वर्षीया सुकुमाया तामाङ र सोही गाउँपालिका–४ का ३१ वर्षीय प्रमोद तामाङ रहेका छन् ।

सुकुमायाले काठमाडौंको मनमैजुस्थित अशोक खाजा घर र प्रमोदले मञ्जुश्री खाजा घर सञ्चालन गरेका र पीडितलाई परपुरुषसँग रकम लिएर जबर्जस्ती वेश्यावृत्तिमा लगाएको आरोप छ ।

प्रहरीका अनुसार पीडितले अस्वीकार गरेमा उनको मोबाइल नम्बर र फोटो सामाजिक सञ्जाल टिकटकमा ‘वेश्यावृत्तिमा संलग्न’ भन्दै सार्वजनिक गरिदिने धम्की दिई डरत्रास देखाएर उक्त कार्यमा बाध्य पारिएको थियो ।

ब्यूरोबाट खटिएको टोलीले यही चैत १६ गते पीडितको उद्धार गरी दुवै आरोपितलाई पक्राउ गरेको हो । उनीहरूविरुद्ध मानव बेचबिखन तथा ओसारपसार मुद्दामा काठमाडौं जिल्ला अदालतबाट सात दिनको म्याद थप गरी थप अनुसन्धान भइरहेको ब्यूरोका एसपी राजन लिम्बूले जानकारी दिए ।