२८ असार २०८३, आइतबार
श्रम संस्कृति पार्टीका अध्यक्ष हर्क साम्पाङले सरकार गठन भएको एक महिना नबित्दै मन्त्रीहरू विवादमा परेको घटनाले सरकारको कास्टिङ झुर भएको टिप्पणी गरेका छन् ।
मन्त्रीहरू एकपछि अर्को गरी विवादमा आउँदा रास्वपाको निर्णय क्षमतामै प्रश्न उठेको उनको टिप्पणी छ ।
सामाजिक सञ्जालमा एउटा भिडियो सन्देश जारी गर्दै साम्पाङले मन्त्रीहरू विवादमा आउनु राम्रो लक्षण नभएको बताएका हुन् ।
‘अचम्म लाग्छ सरकार बनेको १ महिना भएको छैन, कुन मन्त्री के मा फस्यो भन्ने सुन्नु परेको छ । रास्वपाले कस्तो मान्छेलाई मन्त्रिपरिषद्मा लगेको रहेछ भन्ने बारेमा प्रश्न चिन्ह खडा भएको छ । राम्रो संकेत गरेको छैन,’ उनले भने, ‘यस्तो सिनारियोमा देशले कसरी सुशासन गर्छ होला । कास्टिङ झुर भयो जस्तो लाग्छ । रास्वपाको निर्णय क्षमतामा पनि प्रश्न उठ्यो ।’
साम्पाङले विवादमा आएका गृहमन्त्री सुधन गुरुङलाई स्पष्टीकरण भन्दा पनि राजीनामा गर्न सुझाव दिएका छन् ।
