नेपाली कांग्रेसका सभापति गगन थापाले १४औं महाधिवेशनबाट निर्वाचित सदस्यहरूलाई जिम्मेवारी दिएर अगाडि बढ्न चाहेको बताएका छन् । कसैलाई वरिष्ठ बनाउन परे त्यसका लागि पनि तयार रहेको उनले बताए ।

प्रजातान्त्रिक विकास समाजले आइतबार काठमाडौंमा आयोजना गरेको कार्यक्रममा सभापति थापाले निर्वाचन समिति, सदस्यता समिति लगायत संरचनामा पनि इतर समूहलाई सहभागी गराउने बताएका हुन् ।

'१४औं महाधिवेशनबाट निर्वाचित भएको ठूलो पङ्क्ति बाहिर छ । प्रत्येकलाई ल्याएर, सहभागी भएर काम गर्न चाहन्छु,' थापाले भने, 'अधिवेशनको तिथिमिति तय भएको छ, पार्टीको निर्वाचन समितिमा अरू को-को साथी राख्दा हुन्छ त्यसमा पनि छलफल गर्छौं ।'

सभापति थापाले अहिले पार्टी राष्ट्रिय एजेन्डामा छलफलमा व्यस्त भए पनि पार्टीको आन्तरिक विषयलाई पनि उत्तिकै महत्त्व दिएको बताए । उनले जिम्मेवारी बाँडफाँट गर्दा विशेष महाधिवेशनमा सहभागी भए नभएको नहेरिने स्पष्ट गरे । 

'अवसरको सन्दर्भमा, को विशेषमा आएको थियो, थिएन भन्ने कुरामा निर्णय हुँदैन,' थापाले भने ।

सभापति थापाले क्रियाशील सदस्यता सम्बन्धमा महामन्त्री प्रदीप पौडेलको समितिमा समेत हेरफेर गर्न सकिने तर सदस्यता अद्यावधिक नगर भन्न नमिल्ने बताए । 'सदस्यताको कुरा गर्दा कांग्रेसको एक्टिभ मेम्बरलाई नवीकरण गर भनेका हो । अद्यावधिक नगर्ने भनेर के भनेको ?,' थापाले भने, 'नयाँ साथी ल्याउनुस्, सबलाई जोड्नुस् भनेको ।'