रुसले युक्रेनको राजधानी कीभलगायतका क्षेत्रमा गरेको सामूहिक र भीषण आक्रमणले युद्धलाई नयाँ मोडमा पुर्‍याएको छ । युद्ध शुरू भएयताकै ठूलो बमबारीमध्येको एक मानिएको यस आक्रमणमा रुसले शक्तिशाली ‘ओरेश्निक’ हाइपरसोनिक ब्यालिस्टिक मिसाइलको प्रयोग गरेको हो ।

रुसले रातभरको समयमा करिब ६०० ड्रोन र ९० वटा मिसाइल प्रहार गरेको थियो । युक्रेनी हवाई प्रतिरक्षा प्रणालीले अधिकांश हतियारलाई विफल पारे पनि केही ब्यालिस्टिक मिसाइलहरूलाई खसाल्न नसक्दा कीभले भारी क्षति व्यहोरेको छ । यस आक्रमणमा परी कम्तीमा चार जनाको मृत्यु भएको बीबीसीले जनाएको छ । आक्रमणको डरले स्थानीय बासिन्दाहरू घण्टौँसम्म मेट्रो स्टेशनहरूमा आश्रय लिन बाध्य भएका थिए।

रुसले प्रयोग गरेको ओरेश्निक मिसाइल परम्परागत वा आणविक हतियार दुवै बोक्न सक्ने क्षमताको छ । यसको गति र प्रक्षेपण शैलीका कारण युक्रेनको हालको वायु रक्षा प्रणालीले यसलाई रोक्न लगभग असमर्थ छ । यो रुसले ओरेश्निक प्रयोग गरेको तेस्रो पटक हो । युक्रेनी विदेशमन्त्री एन्ड्री सिबिहाले यसपटक प्रहार गरिएको मिसाइलमा डमी हतियार रहेको जानकारी दिएका छन् ।

यो आक्रमण रुसी राष्ट्रपति भ्लादिमिर पुटिनको प्रतिशोधात्मक आदेशमा गरिएको हो । पुटिनले शुक्रबार लुहान्स्कको स्टारोबिल्स्कमा रहेको कलेज छात्रावासमा युक्रेनी ड्रोन आक्रमण हुँदा १८ बालबालिकाको मृत्यु भएको भन्दै त्यसको बदलामा यो कारबाही गरेको दाबी गरेका छन् । यद्यपि, युक्रेनले पुटिनको यस दाबीलाई कडा शब्दमा अस्वीकार गरेको छ । युक्रेनी सेनाले आफूले सधैँ सैन्य पूर्वाधार र लक्ष्यहरूमा मात्र प्रहार गर्ने गरेको बताउँदै शुक्रबारको निशानामा रुसी ड्रोन प्रविधिको अग्रगामी 'रुबिकन' युनिटको मुख्यालय रहेको स्पष्ट पारेको छ ।