२२ जेठ २०८३, शुक्रबार
आगामी एसियाली खेलकुदको छनोट प्रतियोगितामा बिहीबार नेपालले इन्डोनेसियाको सामना गर्दैछ । नेपाल र इन्डोनेसियाबीचको खेल विहान ११:४५ बजे शुरू हुनेछ ।
जारी छनोट प्रतियोगितामा नेपालले खेल्न लागेको यो दोस्रो खेल हो । यसअघि, बुधबार खेलिएको आफ्नो पहिलो खेलमा नेपालले चीनलाई १९ रनले हराएको थियो ।
यो खेलमा विजयी भए नेपाली टोली सजिलै प्रतियोगिताको सेमिफाइनलमा पुग्नेछ । योसँगै नेपाली टोलीको आगामी एसियाली खेलकुद खेल्ने सम्भावना पनि बलियो बन्नेछ ।
छनोट प्रतियोगितामा ६ टोली सहभागी छन् । समूह ‘ए’मा थाइल्यान्ड, मलेसिया र हङ्कङ छन् । समूह ‘बी’मा नेपाल, चीन र इन्डोनेसिया रहेका छन् ।
मलेसियाको क्वालालम्पुरमा जारी प्रारम्भिक चरणको खेलपछि दुवै समूहबाट दुई–दुई टोली छनोट प्रतियोगिताको सेमिफाइनलमा प्रवेश गर्नेछन् ।
यो छनोट प्रतियोगिताबाट तीनवटा टोली जापानमा आयोजना हुने २०औँ एसियाली खेलकुदमा छनोट हुनेछन् ।
छनोट प्रतियोगिताको फाइनलमा पुग्ने दुई टोली र तेस्रो हुने टोलीले एसियाली खेलकुदमा स्थान पक्का गर्ने प्रावधान छ ।
एसियाली खेलकुदको महिला क्रिकेटमा नौ टोलीको सहभागिता रहने छ । ६ वटा टोली यसअघि नै एसियाली खेलकुदमा छनोट भइसकेका छन् ।
जापानले आयोजकका रुपमा एसियाली खेलकुद खेल्नेछ । भारत, पाकिस्तान, बंगलादेश, श्रीलंका र अफगानिस्तानले आईसीसीको पूर्णकालीन सदस्य राष्ट्रको रूपमा सहभागिता जनाउने छन् ।
आगामी एसियाली खेलकुद सन् २०२६ को सेप्टेम्बर १९ देखि अक्टोबर ४ तारिखसम्म जापानमा आयोजना हुँदैछ ।
यसअघि, चीनविरुद्धको खेलमा नेपालले टस जिती पहिले ब्याटिङ गर्दै निर्धारित २० ओभरमा पाँच विकेट गुमाएर एक सय २५ रन बनाएको थियो ।
जवाफी ब्याटिङमा ओर्लिएको चीनको टोलीले भने निर्धारित ओभरमा पाँच विकेट गुमाएर एक सय ६ रनमात्र बनाउन सक्यो ।
नेपाली टोलीका लागि पूजा महतोले उत्कृष्ट अर्धशतकीय पाली खेलिन् । ओपनर ब्याट्र पूजाले लामो समय टिकेर ६३ रन बनाएकी थिइन् ।
२० वर्षीया पूजाले महिला टी–२० अन्तर्राष्ट्रिय क्रिकेटमा बनाएको यो चौथो अर्धशतक थियो । रुवी पोद्दारले पनि २५ बलमा अविजित २२ रन बटुलेकी थिइन् ।
चीनलाई लक्ष्यसम्म पुग्न नदिन नेपाली टोलीका बलरले कसिलो बलिङ गरेका थिए । रिया शर्माले दुई विकेट लिइन् । मनिषा उपाध्याय, कविता कुँवर र पूजा महतोले पनि एक–एक विकेट हात पारे ।
तालिकामा एक खेलबाट दुई अंक बटुलेको नेपाल पहिलो स्थानमा छ । दुई खेलबाट दुई अंक जोडेको चीन दोस्रो र पहिलो खेलमै पराजित भएको इन्डोनेसिया तेस्रो स्थानमा आसिन छन् ।
