बुटवलको थोक बजारमा खान अयोग्य काउली भेटिएको छ ।

विषादी अवशेष द्रुत विश्लेषण प्रयोगशाला एकाइ बुटवलले थोक बजार केन्द्रमा शुक्रबार बिहान हरियो तरकारी तथा फलफूलको नमूना परीक्षण गर्दा अत्यधिक विषादी प्रयोग गरेको पाइएपछि २२ किलो काउली नष्ट गरिएको छ ।

जिल्लाको मर्चवारीमाई गाउँपालिकाबाट बुटवल कृषि उपज थोक बजारमा बिक्रीका लागि ल्याइएको काउलीमा अर्गानोफस्फेट समूहको विषादीको मात्रा ८०.८९ प्रतिशत भेटिएको प्रयोगशाला एकाइ बुटवलका नायब प्राविधिक सहायक राजीव भण्डारीले जानकारी दिए ।

‘सामान्यतः कुनै पनि तरकारीमा कार्वामेट र अर्गानोफस्फेट समूहको विषादी मात्रा ३५ प्रतिशतभन्दा कम भएमा खान योग्य मानिन्छ । ३५ प्रतिशतदेखि ४५ प्रतिशत भएमा केही दिन क्वारेन्टाइनमा राखेर पुनः परीक्षण गरी खान मिल्ने र विषादीको मात्रा ४५ प्रतिशत भन्दा बढी देखियो भने त्यसलाई खान योग्य मानिँदैन र नष्ट गर्नुपर्छ,’ उनले भने ।