फिफा विश्वकप अन्तर्गत अन्तिम ३२ को रोमाञ्चक खेलमा इंग्ल्याण्डले प्रजातान्त्रिक गणतन्त्र कंगो लाई २–१ ले पराजित गर्दै अन्तिम १६ मा आफ्नो स्थान सुरक्षित गरेको छ ।

बुधबार राति सम्पन्न खेलमा इंग्ल्याण्डको जितमा कप्तान ह्यारी केनले नायक सावित भए । उनले अन्तिम १५ मिनेटमा गरेको दुई उत्कृष्ट गोलले सम्भावित हारबाट टोलीलाई जोगाउँदै पुनरागमन जित दिलाएका हुन् । 

अमेरिकाको एटलान्टा स्टेडियममा भएको खेलमा कंगोले सातौँ मिनेटमै ब्रायन सिपेन्गाको गोलमार्फत अग्रता लिएको थियो । ७५ मिनेटसम्म सोही अग्रता कायम राख्दै कंगोले इंग्ल्याण्डलाई विश्वकपबाटै बाहिरिने संघारमा पुर्‍याएको थियो । 

तर संकटको घडीमा कप्तान ह्यारी केनले 'क्याप्टेन फ्यान्टास्टिक' को भूमिका निभाउँदै टोलीको उद्धार गरे । खेलको ७५ औँ मिनेटमा एन्टनी गोर्डनको सटिक पासलाई हेडमार्फत जाली चुमाउँदै केनले खेललाई १–१ को बराबरीमा ल्याए ।

त्यसपछि खेल थप रोचक बन्यो र ८६ औँ मिनेटमा पुन: गोर्डनकै पासमा केनले पेनाल्टी बक्सको नजिकबाट प्रहार गरेको सशक्त सट सिधै गोलको माथिल्लो कुनामा छिरेपछि स्टेडियममा रहेका इंग्लिस समर्थकहरू खुसीले झुमेका थिए । केनको यो गोलले इंग्ल्याण्डलाई २–१ को अग्रता दिलायो भने जुन अन्ततः निर्णायक सावित भयो ।

प्रशिक्षक थोमस टुचेलले दोस्रो हाफमा गरेका रणनीतिक परिवर्तनहरू इंग्ल्याण्डको जितमा सहयोगी सावित भयो । मिडफिल्डर डेक्लान राइसलाई केही समयका लागि रक्षापङ्क्तिमा सार्नु र थप आक्रामक खेलाडीहरू मैदान प्रवेश गराउनुले टोलीमा नयाँ ऊर्जा थपेको थियो । एन्टनी गोर्डनले दुवै गोलका लागि 'असिस्ट' गर्दै केनलाई गोल गर्ने सुवर्ण अवसर सिर्जना गरिदिएका थिए ।

यो जितसँगै अब इंग्ल्याण्डले आगामी जुलाई ६ मा मेक्सिकोको सामना गर्नेछ । दुई गोलसँगै ह्यारी केन यस विश्वकपमा ५ गोल पुर्‍याउँदै गोल्डेन बुटको दौडमा पनि सशक्त रूपमा अगाडि बढेका छन् । हारसँगै कंगो भने घर फर्किने भएको छ ।