जनकपुरबाट आसार २५ देखि शुरू भएको मिटरब्याजविरुद्धको ‘पैदल न्याय मार्च’ आइतबार चौथो दिनमा लालबन्दीबाट अघि बढेको छ । 

राज्यलाई ब्युँझाउन र आफ्ना हकअधिकार स्थापना गर्न उद्यमी तथा पीडितहरूले थालेको यो यात्रा काठमाडौं नपुगी नरोकिने बताइएको छ । 

न्याय खोजीमा निस्किएका सयौं सहभागीहरूले ‘चुपचाप तमसूक फाड’ र ‘अधिकार माग्न काठमाडौं जान पर्दैन’जस्ता नारा लेखिएका प्लेकार्ड बोकेका छन् । 

उनीहरू प्रत्येक दिन करिब २०–२६ किलोमिटर पैदल यात्रा गर्दै राजधानीतर्फ अगाडि बढिरहेका छन् । आयोजकको भनाइअनुसार सरकारले चारपटक सहमति दिए पनि प्रतिबद्धता कार्यान्वयन नगरेकाले दबाब बढाउन फेरि काठमाडौं गुन्जायमान बनाउनुपर्ने अवस्था आएको छ ।

उनीहरू करिब एक साताभित्र काठमाडौं पुग्नेछन् ।