नेपाली कांग्रेसका सभापति गगनकुमार थापाले सरकारले नागरिकको मुख थुनेर अधिनायकवादी सत्ता चलाउन खोजेको आरोप लगाएका छन् । 

४४औँ बीपी स्मृति दिवसको तयारीका लागि केन्द्रीय नीति, अनुसन्धान तथा प्रशिक्षण प्रतिष्ठानले सोमबार आयोजना गरेको बैठकमा थापाले नागरिकको निजी सम्पत्ति र जीवनमा क्षति पुर्‍याउने अधिकार राज्यलाई नभएको बताए ।

सुकुम्वासी समस्या र गणेश नेपालीको आत्मदाहबारे प्रश्न उठ्न थालेपछि सरकारले करुणाविहीन व्यवहार देखाएको उनले उल्लेख गरे । थापाले साउन ७ गतेदेखि भदौ २४ सम्म कांग्रेसले नयाँ अभियान सञ्चालन गर्ने जानकारी समेत दिए ।

बैठकमा उपसभापति विश्वप्रकाश शर्माले साउन ६ गते बीपी स्मृति दिवसको अवसरमा जलवायु परिवर्तनमा केन्द्रित रहेर 'ग्रिन रन', चित्रकला र संवाद कार्यक्रम आयोजना गरिने बताए । 

त्यस्तै, साउन ७ गते राष्ट्रिय सभागृहमा विचार गोष्ठी हुनेछ । बैठकमा पार्टीका पदाधिकारी, केन्द्रीय सदस्य र विभिन्न भ्रातृ संस्थाका प्रतिनिधिहरूको सहभागिता थियो ।