भारत सरकारको सहयोगमा सोलुखुम्बुको लिखुपिकेमा बन्ने ङग्युर ञिङ्मा पल्युल दोङग क्षोलिङ्ग गुम्बाको शिलान्यास गरिएको छ ।​

लिखुपिके गाउँपालिकाकी अध्यक्ष मीना कार्की बस्नेत र काठमाडौंस्थित भारतीय राजदूतावासका द्वितीय सचिव अजयकुमार सिंहले मंगलबार संयुक्त रूपमा शिलान्यास गरेका हुन् ।

गुम्बाको उक्त भवन भारत सरकारको करिब ३.३ करोड आर्थिक सहयोगमा निर्माण हुने भारतीय दूतावासले जनाएको छ ।

दूतावासका अनुसार यो परियोजना उच्च प्रभाव सामुदायिक विकास परियोजना सोलुखुम्बुको लिखुपिके गाउँपालिकामार्फत कार्यान्वयन गरिनेछ ।

सोलुखुम्बुको लिखुपिके गाउँपालिकाकी अध्यक्ष बस्नेत तथा अन्य सरोकारवालाहरूले भारत सरकारद्वारा प्रदान गरिँदै आएको विकास सहयोगको प्रशंसा गरेका थिए । नयाँ पूर्वाधारले लिखुपिके गाउँपालिकाको समृद्ध सांस्कृतिक सम्पदाको संरक्षणमा मद्दत पुग्ने विश्वास उनीहरूको थियो ।

नजिकको छिमेकी भएको नाताले भारत र नेपालबीच व्यापक र बहुक्षेत्रीय सहकार्य रहेको छ ।

उच्च प्रभाव सामुदायिक विकास परियोजनाको कार्यान्वयनले प्राथमिकताका क्षेत्रमा पूर्वाधार विकास गर्नुका साथै विकास र समृद्धिलाई अगाडि बढाउने नेपाल सरकारको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गर्ने दूतावासले जनाएको छ ।