जलबिरे क्षेत्रमा दुई बस एकापसमा ठोक्किएपछि मुग्लिन–नारायणगढ सडकखण्ड अवरुद्ध भएको छ ।

सडक डिभिजन भरतपुरका अनुसार आइतबार बिहान ७:१५ बजे उक्त सडकखण्डमा दुर्घटना भएपछि सवारी आवागमन प्रभावित भएको हो ।

यसअघि सुरक्षाको दृष्टिकोणले जिल्ला प्रशासन कार्यालयको निर्णयअनुसार शनिबार राति १० बजेदेखि मुग्लिन–नारायणगढ सडकखण्डमा रातिको समयमा सबै प्रकारका सवारीसाधन सञ्चालनमा रोक लगाइएको थियो । 

उक्त रोक आइतबार बिहानदेखि हटाएर सवारी सञ्चालन शुरू गरिएको भए पनि जलबिरेमा भएको दुर्घटनाले सडक पुनः अवरुद्ध भएको सडक डिभिजनले जनाएको छ ।

सडक डिभिजन भरतपुरले चालकहरूलाई हतार नगरी, सीमित गतिमा र लेन अनुशासन पालना गर्दै सवारी सञ्चालन गर्न अनुरोध गरेको छ ।

दुर्घटनाको विस्तृत विवरण आउन बाँकी छ । अहिले जिल्ला ट्राफिक प्रहरी कार्यालय चिवतनका प्रमुखसहितको टोली घटनास्थल प्रस्थान गरेको छ ।