०३ साउन २०८३, आइतबार
काठमाडौं, १९ असार – समूह चरणको अन्तिम खेलमा मेक्सिकोलाई ३–० ले हराएर उच्च आत्मविश्वासका साथ स्विडेनले अन्तिम १६ मा मंगलवार स्विट्जरल्यान्डको सामना गर्दैछ ।
जर्मनीसँगको हारका बावजूद मेक्सिको र दक्षिण कोरियामाथिको विजयका कारण समूह विजेता बनेको स्विडेन यो विश्वकपमा अपराजित रहेको स्विट्जरल्यान्डसँग भिड्न लागेको हो ।
सेन्ट पिटर्सबर्गको क्रेस्तोभ्स्की स्टेडियममा खेलिने यो खेल नेपाली समयअनुसार बेलुका पौने ८ बजे शुरू हुँदैछ ।
स्विट्जरल्यान्डले समूह चरणको पहिलो खेलमा ब्राजिललाई १–१ को बराबरीमा रोकेको थियो भने सर्बियाविरुद्ध जीत र कोस्टारिकासँग बराबरी खेलेर दोस्रो स्थान बनाएको थियो ।
यो खेलमा विजय पाउनेले क्वार्टरफाइनलमा कोलम्बिया वा इंग्ल्यान्डको सामना गर्नेछ ।
स्विडेनका मिडफील्डर दुईवटा खेलमा पहेंलो कार्ड पाएर यस खेलमा सस्पेन्ड भएका छन् । यसै पनि उनी मेक्सिकोविरुद्धको खेलमा घाइते भएर मैदानबाहिर गएका थिए । उनलाई गुस्ताभ स्वेनसनले रिप्लेस गर्ने सम्भावना छ ।
आल्बिन एकदाल, भिक्टर क्लाएसन र मिकाएल लुस्टिगले पनि विचार गरेर खेल्नुपर्ने हुन्छ किनकि उनीहरूले यो खेलमा पहेंलो कार्ड पाए भने स्विट्जरल्यान्डलाई हराउन सफल भएमा पुगिने क्वार्टरफाइनलमा सस्पेन्ड हुनुपर्ने स्थिति आउँछ ।
स्विडेनले आज खेलाउने सम्भावित खेलाडीहरू ओल्सेन, लुस्टिग, लिन्डेलोफ, ग्रान्क्विस्ट, अगस्टिनसन, क्लाएसन, स्वेनसन, एकडाल, फोर्स्बर्ग, टोइभोनेन र बर्ग हुन् ।
उता स्विट्जरल्यान्डका डिफेन्डरहरू स्टेफान लिख्स्टाइनर र फाबियान शार स्विडेनविरुद्धको खेलमा सस्पेन्डमा परेका छन् । माइकल लाङ र योहान जूरूलाई उनीहरूका ठाउँमा खेलाइने सम्भावना छ ।
ब्राजिलविरुद्ध बराबरीका लागि गोल गर्ने स्टिभन जुबेर बिरामी भएकाले खेल्ने नखेल्ने पक्का छैन भने डेनिस जकारिया, भालोन बेहरामी र शेरदान शकिरीले यो खेलमा पहेंलो कार्ड पाएमा सस्पेन्सन खानेछन् ।
आज खेल्ने स्विट्जरल्यान्डका सम्भावित खेलाडी सोमर, लाङ, जूरू, अकान्जी, रोड्रिगेज, बेहरामी, शाका, शकिरी, जेमाइली, एम्बोलो र गाभ्रानोभिच हुन् ।
स्विडेनले सन् १९९४ को विश्वकपपछि पहिलोपटक क्वार्टरफाइनल पुग्नका लागि खेल्नेछ । उक्त प्रतियोगितामा उनीहरू तेस्रो भएका थिए । स्विट्जरल्यान्ड चाहिँ सन् १९५४ मा विश्वकप आयोजना गर्दा क्वार्टरफाइनलसम्म पुगेको थियो तर
त्यसपछिका प्रतियोगितामा अन्तिम १६ कटाउन सकेको छैन ।
जर्मनीसँगको खेलमा अन्तिम समयमा हारेपनि स्विडेनले प्रतियोगितामा राम्रो खेल प्रदर्शन गरिरहेको छ । मेक्सिकोलाई ध्वस्त पारेकाले स्विट्जरल्यान्डविरुद्धको खेलअघि स्विडेनको आत्मविश्वास उच्च छ ।
यी दुई देश यसअघि २७ चोटि भिडिसकेका छन् । दुवैले १०–१० जीत हासिल गरेका छन् भने सातवटा बराबरी खेलेका छन् । अन्तिमपटक उनीहरूले सन् २००२ मा मैत्री खेल खेलेका थिए जुन १–१ गोलको बराबरीमा टुंगिएको थियो ।
