एक रहस्यमयी भाइरस अहिले चीनभरि फैलिरहेको र राजधानी बेइजिङसम्म पुगेको अधिकारीहरूले सोमवार बताएका छन् । चिनियाँ नयाँ वर्षका उपलक्ष्यमा लाखौं मानिस घर जाने बेलामा भाइरसको ठूलै संक्रमणको जोखिम बढेको छ । 

नयाँ कोरोनाभाइरसको स्ट्रेन चीनको मध्यमा रहेको शहर वुहानमा पत्ता लागेको हो । कुनै समयमा आतंक मच्चाएको सार्स भाइरससँग यसको सम्बन्धका कारण डरको स्थिति छ । सन् २००२–०३ मा सार्स भाइरसका कारण लगभग ६५० जनाको मृत्यु भएको थियो ।

वुहानमा एक करोड १० लाख मानिस बस्छन् र त्यो यातायातको प्रमुख केन्द्र हो । चिनियाँ नयाँ वर्षको बिदा यसै हप्ताको अन्त्यबाट शुरू हुन्छ र यसमा करोडौं चिनियाँहरू परिवारसँग भेटघाट गर्न टाढाटाढाबाट घर जाने गर्छन् । 

सोमवार प्रसारण गरिएको एक वेब भिडियोमा वुहानबाट उडान सीए११९ मार्फत मकाउ जाँदै गरेका यात्रुहरूलाई शरीरको तापक्रम जाँच गर्न लगाइएको देखाइएको छ । तापक्रम जाँच गराएपछि मात्र यात्रुहरूलाई विमानबाट ओर्लन दिइएको थियो । 

A web video released Mon shows passengers on flight CA119 from Wuhan to Macao were required to take temperature checks. Passengers were allowed to deboard after complying with the temperature checks. #WuhanPneumonia pic.twitter.com/CFQ3eZiUoM

— Global Times (@globaltimesnews) January 20, 2020

हुन त मानिसबाट मानिसमा यो भाइरस सरेको पुष्टि भएको छैन तर अधिकारीहरूले यसको सम्भावनालाई नकार्न नसकिने बताएका छन् । 

वुहानमा मात्र यसै सप्ताहान्तमा १३६ नयाँ केस आएको स्थानीय स्वास्थ्य आयोगले जनाएको छ । 

बेइजिङको दाशिङ जिल्लाका स्वास्थ्य अधिकारीहरूले वुहान पुगेर आएका दुईजनालाई यसै भाइरससँग सम्बन्धित निमोनियाका लागि उपचार गरिएको र उनीहरूको स्थिति स्थिर रहेको बताए । 

झजियाङ प्रान्तमा पनि पाँचजनालाई श्वासप्रश्वासको समस्या आएपछि क्वारेन्टाइनमा राखिएको बताइएको छ तर डायग्नोसिस पुष्टि भएको छैन ।

एजेन्सी