नेपालबारे भ्रम फैलाउने भारतीय टेलिभिजन जीन्युजका प्रधानसम्पादक सुधीर चौधरीले राजीनामा दिएका छन् । उनको राजीनामा स्वीकृत भएको र आगामी ८ जुलाईमा बिदाई कार्यक्रम राखिएको भारतीय सञ्चारमाध्यमहरुले जनाएका छन् । 
ट्वीटरमा उनले किन जीन्युज छाडे भनेर चर्चापरिचर्चा भएको छ । समाचारहरुमा उनले आफ्नो व्यवसाय गर्न खोजेको उल्लेख गरिएपनि स्पष्ट खुलाइएको छैन । उनी जीन्युजमा पछिल्लो एक दशकदेखि प्रधानसम्पदकको भूमिकामा थिए ।  भारतीय सत्तारुढ पार्टीको पक्षपोषक भएको आरोप लागेपनि उनी चर्चित छन् । 

उनले नेपाल आएर २०७७ सालमा तत्कालीन प्रधानमन्त्री केपी शर्मा ओलीसँग अन्तरवार्ता लिएका थिए भने सगरमाथा पुगेर उनले एभरेस्ट भारत दाबी गर्नुपर्छ भनेर विवादास्पद अभिव्यक्ति दिएका थिए । सगरमाथामा भारतले दाबी गर्नुपर्छ भन्ने आफ्नो अभिव्यक्तिलाई लिएर नेपालमा चर्को विरोध भएपछि चौधरीले अन्ततः माफी नै माग्नुपरेको थियो । 

चौधरीले सगरमाथाको सावैभौमिकतामाथि भारतले दाबी नगरेको र आफ्नो प्रस्तुतीबाट भ्रम फैलिएको भन्दै माफि मागेका थिए । माफी माग्ने क्रममा उनले माउन्ट एभरेस्टको लोकेसनलाई कसैले बदल्न नसक्ने र नेपालमै भएको बताएका थिए । ‘माउन्ट एभरेस्ट नेपाल र तिब्बतको बीचमा छ र यहीँ नै रहन्छ, यसलाई कसैले खोस्न सक्दैन, यसको नाम चाहिँ परिवर्तन हुनुपर्छ’, उनले भनेका थिए । 

उसो त उनको टेलिभिजन च्यानलबाट चीनसँग जोडेर नेपालको विषयमा अनेकन भ्रम फैलाइएको थियो । त्यतिबेला जीन्युजको चर्को आलोचना भएको थियो ।