पूर्वउपप्रधानमन्त्री एवं निलम्बित सांसद टोपबहादुर रायमाझी र सचिव टेकनारायण पाण्डेसहित ७ जनालाई रिहा गर्न सर्वोच्च अदालतले अस्वीकार गरेको छ ।

न्यायाधीशद्वय कुमार रेग्मी र टेकप्रसाद ढुंगानाको संयुक्त इजलासले बिहीवार रायमाझीलगायत ७ जनाको सवालमा उच्च अदालत पाटनको आदेश सदर गर्दै कानूनबमोजिम गर्न आदेश गरेको हो ।

प्रतिवादीहरू रायमाझी, पाण्डे, डा इन्द्रजीत राई, केशवप्रसाद दुलाल, सानु भण्डारी, सागर राई र सन्देश शर्माको हकमा २०८० मंसिर ५ मा गरेको आदेशलाई नै सदर गरिएको छ । 

यस्तै प्रतिवादी आङ्टावा शेर्पालाई थुनामा राखी मुद्दाको पुर्पक्ष गर्ने आदेशलाई बदर गर्दै सर्वोच्चले ३० लाख रुपैयाँ धरौटी माग गरेको छ ।

अर्का प्रतिवादी गोविन्द चौधरीबाट १० लाख रुपैयाँ धरौटी माग गरिएको छ । उनी पनि पुर्पक्षका लागि थुनामा थिए ।  त्यसैगरी शमशेर मियासँग १० लाख रुपैयाँँ धरौटी लिएको उच्चको आदेशलाई समेत बदर गर्दै साधारण तारेखमा रिहा गर्न सर्वोच्चले आदेश गरेको हो ।

नेपालीलाई नक्कली भुटानी शरणार्थी बनाएर अमेरिका लाने ठगी प्रकरणमा नेकपा (एमाले)का नेतासमेत रहेका रायमाझी २०८० वैशाख ३१ गते काठमाडौंको बूढानीलकण्ठस्थित पासिकोटबाट पक्राउ परेका थिए । 

जिल्ला अदालत काठमाडौंले २०८० असार १ गते  पूर्वममन्त्री बालकृष्ण खाँण र रायमाझी, सचिव पाण्डेसहितका १६ जनालाई पुर्पक्षका लागि थुनामा राख्न आदेश दिएको थियो । 

सात महिना जेल बसेपछि खाँण पाटन उच्च अदालतको आदेशमा गत मंसिर २९ गते ३० लाख धरौटीमा थुनामुक्त भइसकेका छन् ।