काठमाडौँ । राजधानी काठमाडौँको पोखरीमा हुलका हुल महिला धमाधम भित्ता सम्याउँदै र खुट्टाले माटो मुछ्दै छन् । प्राकृतिक मिश्रण बज्र तयार हुँदै छ । इँटा पखालिँदै छ । 
राजा प्रताप मल्लको पालामा बनेको रानीपोखरी २०७२ सालको भूकम्पले भत्कियो । पुनःनिर्माण गर्न लाग्दा केही समयअघि विवाद पनि देखियो तर अहिले भक्तपुरका कामदार आएपछि काम धमाधम भइरहेको छ । “सुरुमा आउँदा यहाँ हामीजत्रै घाँस र गन्हाउने फोहोर धेरै थियो, मरेका कुकुर पनि फाल्यौँ,” माटो मुछ्दै शर्मिला नापितले भनिन्, “अब पोखरीको रूप सिँगार्दै छौँ । ” 

“रानीपोखरी पुनःनिर्माणले अब गति लिएको छ,” प्राधिकरणका विज्ञ राजु मानन्धरले भने, “पूर्वको जग निर्माण सकेर पर्खाल निर्माण सुरु भयो, पश्चिममा भित्ता र पिँध निर्माण आइतबारदेखि सुरु भयो । ” पश्चिमतिर राजा प्रताप मल्लको पालाको धेरै इँटा कमजोर भेटिएकाले त्यही आकार र गुणस्तरका नयाँ इँटा निर्माण गरी ल्याएको उनले जानकारी दिए । 

पुरानै शैलीमा पोखरी बनाउन भक्तपुरको सिद्धपोखरी र भाजुपोखरी निर्माणको काम हेरेपछि उतैको प्राविधिक सहयोग लिइएको हो । माटोको पिँधबाट पानी बस्छ, बस्दैन भन्ने थाहा पाउन बनाएको नमुना पोखरीमा पानी जमेपछि त्यहीअनुसार बनाउन थालिएको उनले बताए । 
पोखरी र पर्खालका लागि नौ करोड ९७ लाख रुपियाँ बजेट छ ।  आउँदो भाइटीकासम्म पोखरीमा पानी राख्ने योजना प्राधिकरणको छ । 
रानीपोखरीका लागि भक्तपुरका तर्फबाट प्राविधिक सहयोगीका रूपमा अनुभवी कामदार दिइएको भाजुपोखरी उपभोक्ता समितिका अध्यक्ष कृष्णप्रसाद डुमरूले बताए । गाेरखापत्रमा खबर छ ।