कास्कीको पोखरा महानगरपालिका–११ रानीपौवामा बिहान १० नबज्दै आश्रम अगाडि भोको पेटको लाइन देखिन्छ ।

नेपाल मानव धर्म सेवा समिति श्री हंश सनातन मन्दिरले विपन्न तथा मजदुरलाई दैनिक भोजन उपलब्ध गराउन थालेपछि खाना खाने समयमा भोको पेटहरू खानाको पर्खाइ हुने गर्दछन् । 

विशेषगरी सेती नदी किनारमा बालुवा गिट्टी चालेर ज्याला मजदुरी गर्दै आएका विपन्न परिवार छन् । बन्दाबन्दीको कारण काम गरेर खान पाउने अवस्था नबन्दा उनीहरूको दैनिकी सहज हुन सकेको छैन । 

विपन्न परिवारको अवस्थालाई ध्यान दिएर आश्रमले वैशाख १५ गतेदेखि निरन्तर भोजन वितरण गर्न शुरू गरेको आश्रमका गण्डकी प्रदेश प्रभारी महात्मा पिताम्बरा बाइजीले जानकारी दिइन् ।

उनका अनुसार भोजन वितरण कार्यका लागि हाल दैनिक २० जनाले स्वयंसेवकको रुपमा सहयोग गर्दै आएका छन् । आश्रमले पोखराको रानीपौवामा र लेखनाथको सत्यलोक आश्रम पोखरा–२६ बाट दैनिक करीब २०० भन्दा बढीलाई खाना प्रदान गर्दै आएको छ । आश्रमका युथ विङ्स तथा कार्यक्रम संयोजक ओम उपाध्यायले भोजन कार्यक्रम पहिलो चरणमा वैशाख २५ गतेसम्म जारी रहने र त्यसपछि पनि लकडाउनको अवधि हेरेर निरन्तरता दिइने जानकारी दिए । उनका अनुसार भोजन हरेक दिन बिहान १० देखि १२ बजेसम्म उपलब्ध हुनेछ ।

कठिन अवस्थामा रहेका परिवारलाई घरमा नै खाना पुर्‍याउने कार्य समेत गरिँदै आएको उनले बताए । उपाध्यायले भने, ‘कठिन अवस्थामा एक मानव अर्को मानवको सेवामा जुट्नु नै सच्चा धर्म हो, विपद्को समयमा एकअर्काप्रति सद्भाव र सहिष्णु भएर सेवाकर्ममा निरन्तरता दिनुपर्छ ।’

पोखराको रामघाटमा बस्दै आएकी सेती विकले बिहानको छाक आश्रमबाट खाना लगेर खाने गरेको बताए । उनले भनिन्, ‘४ जनाको परिवार छौं, गिट्टी, बालुवा चालेर जीविकोपार्जन गथ्र्यौं, अहिले लकडाउनले काम गर्न पाएका छैनौं, दया धर्म हुनेहरूबाट जीवन चलिरहेको छ ।’ स्थानीय सरकारले दिएको राहतले बेलुकाको छाक पकाउँदै आएको उनले बताइन् ।