ताइवानलाई स्वतन्त्र मुलुक बन्न नदिनका लागि अन्य उपाय नभएमा चीनले सैन्य आक्रमण गर्ने देशका एक शीर्ष सैन्य अधिकारीले बताएका छन् । 

जोइन्ट स्टाफ डिपार्टमेन्टका प्रमुख तथा सेन्ट्रल मिलिटरी कमिसनका सदस्य ली झुओचेङले शुक्रवार बेइजिङमा भने, ‘शान्तिपूर्ण पुनरेकीकरणको सम्भावना भएन भने जनमुक्ति सेनाले ताइवानका जनतालाई समेत साथमा लिँदै कुनै पनि पृथक्तावादी षड्यन्त्र वा कार्यलाई दृढतापूर्वक ध्वस्त पार्नका लागि सबै आवश्यक कदम चाल्छ ।’

‘हामी बलप्रयोग त्याग्ने प्रतिज्ञा गर्दैनौं र ताइवान जलप्रपातमा स्थिरता तथा परिस्थिति नियन्त्रणमा राख्न सबै आवश्यक उपायहरू अपनाउने विकल्प खुला राख्छौं,’ उनले भने । 

बेइजिङले हङकङका विषयमा राष्ट्रिय सुरक्षा कानून पारित गरेपछि विश्वभर भइरहेको आलोचनाका बीचमा यी जनरलको कठोर अभिव्यक्ति आएको हो । 

लीले पृथक्तावादविरोधी कानून पारित भएको १५औं वर्षगाँठको अवसरमा यो बयान दिएका हुन् । उक्त कानूनले ताइवान पृथक् भएमा वा हुन खोजेमा चीनलाई सैन्य कारवाही चलाउन कानूनी अनुमति दिन्छ । त्यसैले अब ताइवान जलप्रपात सम्भावित सैन्य मुठभेडको केन्द्र बन्न सक्ने देखिएको छ । 

चीनले ताइवानलाई आफ्नो नियन्त्रणमा ल्याउनका लागि बलप्रयोग गर्ने कुरालाई कहिले पनि त्यागेको छैन तर बहालवाला शीर्ष सैन्य अधिकृतले यसरी सार्वजनिक स्थानमा स्पष्ट रूपमा धम्की दिएको चाहिँ दुर्लभ घटना हो ।