अमेरिकाका राष्ट्रपति डोनल्ड ट्रम्पले शक्तिशाली देशहरूको समूह जी७ को बैठक सेप्टेम्बर महिनासम्मका लागि स्थगित गरेका छन् । 

जी७ मा अमेरिका, फ्रान्स, बेलायत, क्यानडा, इटली, जर्मनी र जापान छन् । कोरोनाभाइरस प्रकोपका कारण ट्रम्पले बैठक स्थगन गरेका हुन् । 

यस समूहको बैठकमा भारत, रुस, दक्षिण कोरिया र अस्ट्रेलियालाई पनि निमन्त्रण गर्नुपर्ने ट्रम्पको भनाइ छ । यी सबै देशलाई साथमा लिएर चीनविरुद्ध आक्रामक नीति बनाउने लक्ष्य ट्रम्पको छ । 

जी७को बैठकमा अमेरिकाले कोरोनाभाइरस र दक्षिण चीन समुद्रका विषयमा चीनविरुद्ध कडा प्रतिबन्ध लगाउनका लागि आफ्नो गुटलाई बलियो बनाउन कोशिश गरिरहेको छ । 

भारत र अस्ट्रेलियासँग अहिले चीनको सम्बन्ध सुमधुर छैन त्यसैले उनीहरूलाई पनि जी७ को बैठकमा निम्त्याउने कोशिश ट्रम्पले गरेका हुन् । अनि रुसप्रति ट्रम्प पहिलेदेखि नै नरम छन् । दक्षिण कोरिया पनि उत्तरपूर्वी एसियामा अमेरिकाको साझेदार हो तथा चीनले उसलाई पहिले पनि दुःख दिने गरेको छ ।

त्यस्तै संसारको सबभन्दा ठूलो क्षेत्रीय संगठन शांघाई सहकार्य संगठन (एससीओ) को बैठक रुसमा बस्ने कार्यक्रम छ र त्यसमा पनि चीनसम्बन्धी तनाव हुन सक्छ । तर रुस र भारत चीनसँग सीधै भिड्न चाहँदैनन् ।