२१ असार २०८३, आइतबार
कर्णाली प्रदेशमा कोरोना संक्रमण पुष्टि हुनेको संख्या दैनिक रुपमा घट्दै गइरहेको सामााजिक विकास मन्त्रालयले जनाएको छ ।
मन्त्रालयको स्वास्थ्य महाशाखाका प्रमुख डा. लक्ष्मी नारायण तिवारीका अनुसार साउनको १ गते १२ जनामा कोरोना पुष्टि भएको थियो भने साउन २ गते ७ जना र ३ गते शनिवार ४ जनामा कोरोना संक्रमण भएको पुष्टि भएको छ ।
‘२०७७ जेठ ५ गतेदेखि ३२ गतेसम्म कर्णालीमा ९५७ जनामा कोरोेना देखिएको थियो । असार १ गतेदेखि ३१ गतेसम्म ७५७ जनामा कोरोना देखिएको छ तर साउनमा भने २३ जनामा मात्रै कोरोना पुष्टि भएको हो,’ उनी भन्छन्, ‘दैलेखमा हालसम्म ८११ जनामा कोरोना देखिएको छ भने सुर्खेतमा ४९७ जनामा कोरोना देखिएको हो । सल्यानमा २२० जनामा कोरोना देखिएको छ । जम्मा १ हजार ७३७ जनामा कोरोना पुष्टि हुँदा २२१ जना मात्रै आइसोलेसनमा बसेर उपचार गराइरहेका छन् ।’
कर्णालीमा हालसम्म ३६ हजार ७२३ जनाको स्वाब जाँच गरिएको मन्त्रालयले जनाएको छ । मन्त्रालयका अनुसार सबैभन्दा बढी कर्णाली स्वास्थ्य विज्ञान प्रतिष्ठान जुम्लाले १८ हजार ४६४ जनाको स्वाब जाँच गरेको छ । प्रदेश अस्पताल कालागाउँ सुर्खेतले १६ हजार २३९ जना, दैलेख अस्पतालले १ हजार २४४ र चौरजहारी नगरपालिकाको पीसीआर प्रयोगशाला रुकमु पश्चिमले ७७६ जनाको पीसीआर जाँच गरेको छ ।
दैलेखमा ३४ जना, सुर्खेतमा १२६ जना, जाजरकोटमा ५ जना, सल्यानमा १६ जना, रुकुम पश्चिममा १२ जना, जुम्लामा ६ जना, कालिकोटमा ११ जना, मुगुमा र डोल्पामा १/१ जना आइसोलेसनमा रही उपचार गराइरहेका छन् ।
