कोरोनाबाट मृत्यु भएकी महिलाको शव गाडिएको धनगढी नगरपालिका वडा नम्बर १मा रहेको कब्रस्तान सिल गरिएको छ ।

धनगढी उपमहानगरपालिका प्रवक्ता तथा वडा नम्बर १ का वडाध्यक्ष सन्तोष मुडभरीको रोहभरमा सो क्षेत्र सिल गरिएको हो । जिल्ला प्रशासन कार्यालयमा सरोकारवालाहरू बिच छलफल गर्दा पनि कुनै निष्कर्ष नआए पछि अर्को निर्णय नभए सम्मका लागी कब्रस्तान सिल गरिएको धनगढी उपमहानगरपालिकाका प्रवक्ता सन्तोष मुडभरीले बताए ।

सेती प्रादेशिक अस्पतालको कोभिड अस्थायी अस्पतालमा उपचारका क्रममा बिहीबार बिहान मृत्यु भएकी कोरोना सङ्क्रमित महिलाको शव स्थानीय प्रशासन र नेपाली सेनाको टोलीले बस्ती बीचमै रहेको कब्रस्तानमा गाडेका थिए ।
मानववस्ती सँगै रहेको कब्रस्तानमा कोरोना सङ्क्रमितलाई गाडेको भन्दै आक्रोशित स्थानीयहरूले कब्रस्तानको गेटमा ताला लगाएका छन् । उनीहरूले त्यहाँ गाडिएको शव निकालेर अन्यत्रै व्यवस्थापन गर्न माग गरिरहेका छन् ।
धनगढी उप–महानगरपालिका वडा नम्बर २ कि ५७ बर्सिया महिलाको सेती प्रादेशिक अस्पतालमै बिहीबार विहान मृत्यु भएको थियो ।

कब्रस्तान नखुल्दा शव आँगनमै 

मानववस्तीसँगै जोडिएका कब्रस्तानमा कोरोना सङ्क्रमितको शव व्यवस्थापन गरेको भन्दै स्थानीयले विरोध स्वरूप कब्रस्तानमा गरिएको तालाबन्दी नखुल्दा अर्को शव व्यवस्थापनमा समस्या सिर्जना भएको छ।

दुवै मिर्गौलाले काम गर्न छाडेपछि शुक्रवार बिहान मृत्यु भएको धनगढी उपमहानगरपालिका–१, का ५० वर्षीय मोहम्मद जमसेदको शव व्यवस्थापनमा समस्या भएको आफन्तले गुनासो गरेका छन्।

‘कोरोना सङ्क्रमितलाई कब्रस्तानमा गाडिएको भन्दै स्थानीयले कब्रिस्तानमा लगाएको तालाबन्दीले गर्दा मैले बुबाको शव व्यवस्थापन गर्न सकेको छैन,’ मृतक जमसेदका छोरा सद्दामले भने, ‘हाम्रो संस्कारअनुसार क्रिस्तानमै शव गाड्नुपर्छ। तर, कब्रस्तानमा तालाबन्दी गरिएपछि अन्तिम संस्कार गर्न नपाउँदा बिहानदेखि शव आँगनमै राखेका छौँ ।’

कैलालीका प्रमुख जिल्ला अधिकारी यज्ञराज बोहराले कब्रस्तानमा गरिएको तालाबन्दीका कारण अर्को शव व्यवस्थापनमा समस्या आएकाले मुस्लिम समुदाय र तालाबन्दी गर्ने पक्षसँग छलफल गरिरहेको बताए।