कञ्चनपुरको कृष्णपुरका २२ वर्षीय सविन थापा भाइटीकाको समयमा घुम्न कैलालीको चिसापानी पुगे । दुई वर्षअघि मात्रै चिसापानी पुगेका उनले अहिले भने त्यहाँ पुग्दा निकै परिवर्तन पाए ।

विगतमा कर्णालीको पुलमा एकै छिन फोटो खिचेर फर्किहाल्ने उनी यसपालि भने अबेर साँझसम्म टिके । जीप लाइन सञ्चालनमा रहेको देखेपछि उनी पनि सहभागी बन्न त्यहाँ पुगेका थिए ।

उनी मात्रै हैन चिसापानी (कर्णाली) पुग्ने पर्यटकहरू साहसिक खेल जीप लाइन खेल्न र हेर्न झुम्ने गरेका छन् । 

जीप लाइनको अनुभव लिनका लागि पछिल्लो समय पर्यटकहरू चिसापानी पुग्ने गरेका छन् । त्यस ठाउँमा आन्तरिक तथा बाह्य पर्यटकहरू समेत आएर आनन्द लिने गरेका छन् ।

जीप लाइनको अनुभव लिएपछि दशैंतिहारका लागि काठमाडौंबाट घर आएका कैलाली घोडाघोडीका गणेश मल्लले भने, ‘पहिलोचोटि हो मैले यो खेलेको, आनन्द आयो । शुरूमा त डर लागिरहेको थियो । निकै रमाइलो भयो । परिवारसँग कर्णाली घुम्न आएको थिएँ ।’ 

चिसापानीमा सञ्चालनमा आएको जीप लाइनमा पुरुषहरूले मात्रै आनन्द लिइरहेका छैनन्, महिलाहरू पनि यो खेलमा सहभागी हुने गरेका छन् ।

‘धनगढी हसनपुरकी शिखा पन्तले भनिन्, ‘चिसापानीमा यस्तो सुविधा छ भन्ने जानकारी थिएन, यहीँ आएर थाहा पाएकी हुँ ।’

‘हेर्दा डर लाग्ने खाले देखिएपनि त्यस्तो छैन, मैले पहिलोपटक नयाँ खेलेका कारण अनुभव लिएकी हुँ, आनन्द आउँदोरहेछ,’ उनले भनिन् ।

केही वर्ष विदेश बसेका कैलाली लम्कीका युवा तपेन्द्र रावलले जीप लाइन सेवा सञ्चालनमा ल्याएका हुन् ।

चिसापानी एड्भेञ्चर रिपोर्टले चिसापानी क्षेत्रमा घुम्न आउने पर्यटकहरूका लागि साहसिक खेलको मनोरञ्जन दिने उद्देश्यले जीप लाइन सेवा सञ्चालनमा ल्याइएको सञ्चालक तपेन्द्र रावलले बताए । 

‘जीप लाइन एक साहसिक मनोरञ्जनको माध्यम हो,’ उनले भने, ‘जसमा एक ठाउँबाट अर्को ठाउँसम्म तारमा घिर्नीको सहायताले झुण्डिएर गुड्नुपर्ने हुन्छ । यसका लागि हामीले पूर्ण सुरक्षाको व्यवस्था पनि गरेका छौं ।’ 

चिसापानी एड्भेञ्चर रिपोर्टले जीप लाइनका साथै र्‍याफ्टिङ सेवा पनि दिँदै आएको छ । पछिल्लो समय कर्णाली नदीमा पर्यटन प्रवद्र्धनका लागि विभिन्न गतिविधिहरू हुँदै आएका छन् ।

कर्णाली नदीको किनारमा हामीले सञ्चालनमा ल्याइएको जीप लाइन सेवा करीब १ सय ३० मिटर लामो लाइन अन्तर्राष्ट्रिय मापदण्डअनुसार निर्माण गरेका हौं,’ सञ्चालक रावलले भने, ‘करीब १० लाख लागतमा २०७६ सालको माघ महिनाबाट जीप लाइन सेवा सञ्चालनमा ल्याएका हौं । एकपटक जीप लाइन सेवा लिएमा २ सय शुल्क तोकेका छौं ।’ 

साहसिक खेल जीप लाइनको मज्जा लिन अहिले दैनिक पर्यटकहरूले भीड लाग्ने गरेको छ । 

अहिले साहसिक खेल जीप लाइन अनुभव लिन दैनिक २०० देखि ३०० जना आन्तरिक तथा बाह्य पर्यटकहरू आउने गरेका छन् ।

मोहन्याल गाउँपालिकाको वडा नम्बर ७ पितमारीको कर्णाली नदीको छेउमा जीप लाइन सञ्चालनमा ल्याइएको छ ।