निषेधाज्ञा अवज्ञा गर्दै लखरलखर सडक घुम्नेहरु प्रहरीको फन्दामा परेका छन् ।

 उनीहरुलाई पोखराका मुख्य मुख्य चोकबाट समातेर रोक्ने गरिएको छ । गन्तव्यमा जान नपाएका यात्रु भने मर्का परेको गुनासो गरेका छन् ।

गण्डकी प्रदेशको राजधानी पोखरामा दिनानुदिन कोरोनाका संक्रमित बढ्न थालेपछि जिल्ला प्रशासन कार्यालय कास्कीले जारी निषेधाज्ञा मंगलबारदेखि कडाइ गरेको छ । सुरुवातको दिन सम्झाएर पठाउने गरिएकोमा दोस्रो दिन बुधबार भने मास्क नलगाउने, अत्यावश्यक कामबाहेक बाहिर निस्कनेलाई प्रहरीले जहाँको तहीँ रोकेर राख्ने गरेको हो ।

यत्तिकैमा पोखराको पृथ्वीचोकमा ठूलो संख्यामा सर्वसाधारण समातिएका छन् । 

प्रशासनले गत वैशाख १५ देखि एक साताका लागि निषेधाज्ञा आदेश जारी गरेकोमा कोरोनाको महामारी बढ्दै गएपछि कडाइसहित अवधि थपेको हो । वैशाख २१ देखि वैशाख मसान्तसम्म अत्यावश्यक कामबाहेक बाहिर निस्कन पाइने छैन भने तोकिएको समयमा छुट प्रदान गरिएका सेवा लिन सकिने भए पनि अन्य सेवा रोकिएको छ । 

पहिले जस्तो जोरबिजोर प्रणाली हटाइएको छ । निजी तथा सार्वजनिक यातायातका साधन चल्न रोक लगाइएको छ । 

दैनिक उपभोग्य बस्तुहरुका पसल बिहान ५ देखि ९ बजेसम्ममात्रै संचालन गर्न सकिने छ । बैंक तथा वित्तीय संस्थाहरु एक चौथाइ मात्र राखेर संचालन गरिएको छ । स्कुल, कलेज, शैक्षिक संस्था पूर्ण रुपमा बन्द छन् । 

मठ मन्दिरहरुमा नित्य पूजामात्र गर्न सकिने भए पनि अन्य कार्य गर्न पाइने छैन । बिहान ५ देखि ९ बजेसम्म डिपार्टमेन्ट स्टोर्सहरुको हकमा खाद्यान्न सामान बिक्री गर्न पाइनेछ । ढुंगा, गिट्टी, बालुवा, रड, सिमेन्ट जस्ता निर्माण सामग्री बोक्ने सवारीसाधन दिउँसो १ देखि साँझ ५ बजेसम्म संचालन गर्न सकिने प्रशासनले जनाएको छ ।

कास्की जिल्ला कोरोनाको उच्च जोखिम जिल्ला हो । हालसम्म यहाँ सक्रिय संक्रमितको संख्या १ हजार ५ सय ७८ जना पुगेको छ । कास्कीमा हालसम्म १ सय ३१ जनाको मृत्यु भएको छ । मंगलबारमात्रै एकै दिन ३ सय १० जना संक्रमित थपिएका हुन् ।

गण्डकीमा भने कुल संक्रमित संख्या १९ हजार ८ सय ५३ पुगेको छ । तीमध्ये १७ हजार ७२ निको भएका छन् भने २ सय ३५ को ज्यान गएको छ । आइसियुमा ३४, भेन्टिलेटरमा ३ र एचडीयुमा १४ जनाको उपचार भइरहेको प्रदेश स्वास्थ्य निर्देशनालयले जनायो ।